Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 460 Hüküm no: 517 Orijinal metin no: [75a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Davudpaşa mahallesinden Salih Efendi’nin arsasını İsmail Efendi’ye sattığı Arsa mübâya‘ası Mahmiye-i İslâmbol’da Davudpaşa mahallesinde sâkin mukābele-i süvârî hulefâlarından umdetü erbâbi’t-tahrîr ve’l-kalem zübdetü ashâbi’t-tastîr ve’r-rakam Salih Efendi b. Abdurrahman meclis-i şer‘-i şerîf-i enverde işbu bâ‘isü’l-kitâb İsmail Efendi b. el-Hâc Mustafa mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahalle-i mezbûrede vâki‘ bir tarafdan Kahveci Mustafa Ağa arsası ve bir tarafdan Osman Ağa zevcesi arsası ve bir tarafdan Uzun Mehmed arsası ve bir tarafdan tarîk-i âm ile mahdûd bir müşterek bi’r-i mâ ve zikr olunan Osman Ağa zevcesi tarafından taş duvarı müştemil bir bâb muhterik mülk menzil arsamı tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr İsmail Efendi’ye altmış guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr altmış guruşu mezbûr İsmail Efendi yedinden tamamen ahz ü kabz eyledim, ba‘de’l-yevm arsa-i mahdûde-i mezkûre mezbûr İsmail Efendi’nin mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 21 min-C sene 1197 Şühûdü’l-hâl: Hafız Mehmed Tâhir Efendi b. el-Hâc Mustafa, Abdülhalim Efendi b. el-Hâc Mustafa, Hasan Efendi b. Hüseyin, Hüseyin Ağa b. Hüseyin, Molla Ali b. Halil ve gayruhum.