Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 248 Hüküm no: 204 Orijinal metin no: [56b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Yani’nin, menzil hissesini Kostandi’ye vermek üzere taahhütte bulunması Ma‘rûz, Anadolu’da medîne-i Manisa mahâllâtından Ali Ağa mahallesinde mütemekkin iken işbu târîh-i i‘lâmdan on üç sene mukaddem hâlik olan Anaştaşi v. Panayot v. Adam zimmînin verâseti zevce-i metrûkesi Marino bt. Todori Nasrâniye ile sulbî kebîr oğlu Kostandi ve sulbî sagīr oğulları Andon ve Yanako ve sulbiye kebîr kızları Arduke ve Katerina Nasrâniyelere ve sulbiye sagīre kızları Arhondi ve Erina’ya münhasıra ve tashîh-i meselesi seksen sehmden olup sihâm-ı mezbûreden on sehmi zevce-i mersûme Marino Nasrâniyeye ve on dört sehmi mesfûr Kostandi zimmîye ve on dörder sehmden yirmi sekiz sehmi sagīrân-ı mersûmân Andon ve Yanako’ya ve yedişer sehmden on dört sehmi mersûmetân Arduke ve Katerina Nasrâniyelere kezâlik yedişer sehmden on dört sehmi sagīretân-ı mersûmetân Arhondi ve İrena’ya isâbeti tahakkukundan sonra verese-i mersûmûndan arzuhâl eden ibn-i mesfûr Kostandi zimmî Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyrulan dâirede ma‘kūd meclis-i şer‘-i hatîrde zikri âtî menzile vaz‘-ı yedi mütehakkık olan medîne-i mezbûre re‘âyâsından derûn-ı arzuhâlde mastûrü’l-ism bakkāl tâifesinden Nikola v. Yani nâm zimmî muvâcehesinde medîne-i mezbûrede sâlifü’z-zikr Ali Ağa mahallesinde vâki‘ ma‘lûmü’l-hudûd ve’l-müştemilât bir bâb müfrez mülk menzil babam ve mûrisimiz hâlik-i mersûmun sağlığında ile’l-helâk yedinde mülkü olup ba‘de helâkihi menzil-i mezkûr ber-i‘tibâr-ı merkūm benimle verese-i mersûmesine mevrûs oldukdan sonra mesfûr Niko zimmî menzil-i mezkûru fuzûlî zabt etmekle keff-i yed birle ber-i‘tibâr-ı mezkûr hisse-i irsiyemi mahâllinde bana teslîme mesfûr Nikola zimmîye tenbîh olunmak matlûbumdur deyü da‘vâ etdikde mesfûr Niko zimmî dahi cevâbında işbu yedimde olup bin iki yüz kırk yedi senesi Cemâziyelûlâsı’nın on yedinci günü târîhiyle müverraha ve ol târîhde medîne-i mezkûre nâibi bulunan Mektûbîzâde es-Seyyid Abdülaziz Efendi’nin imzâ ve hatemini hâviye bir kıt‘a hüccet-i şer‘iyye nâtıka olduğu üzere müdde‘î-i mersûm Kostandi zimmî ile kız karındaşları mer[sû]metân Arduke ve Katerina ve sıgār-ı mersûmûnun anaları ve vasiyy-i mansûbları zevce-i mersûme Marino Nasrâniyelerden herbiri menzil-i mahdûd-ı mezkûru bi’l-verâse ve bi’l-vekâle ve bi’l-vesâye lede’l-müzâyede tarafeynden bi’l-îcâb ve’l-kabûl bâtten ve sahîhan semen-i misli olan üç bin beş yüz guruş semen-i medfû‘ [57a] ve makbûza bi’l-verâse ve bi’l-vesâye bana bey‘ ü temlîk ve teslîm eylediklerinde ben dahi iştirâ ve temellük ve tesellüm ve kabz ve kabûl edip ol vechile menzil-i mezkûr mülk-i müşterâm olmak üzere vaz‘-ı yed ederim deyü müdde‘î-i mersûm Kostandi zimmî inkârına mukārin def‘e tasaddî ve ol vechile beynlerinde ba‘de vukū‘i’l-münâza‘a muslihûn tavassutuyla beynleri te’lîf olunup mesfûr Nikola zimmî menzil-i mahdûd-ı mezkûrdan ancak müdde‘î-i mersûm Kostandi zimmînin ber-i‘tibâr-ı merkūm on dört sehm hisse-i şâyi‘asını mahâllinde teslîme ta‘ahhüd edip mesfûr Kostandi zimmî dahi râzı ve ta‘ahhüdünü kabûl edip bu vechile kat‘-ı münâza‘a eyledikleri tescîl ve huzûr-ı [âlîlerine i‘lâm olundu]. Fî 18 Ra sene [12]57.