Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 461 Hüküm no: 518 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayezid Ağa mahallesinden Ümmügülsüm bt. Hasan ile Ömer Beşe’nin boşanmaları Muhâla‘a ale’l-mehr ve sagīreleri 9 yaşını tekmîl edince mâlından infâk etmek üzere muhâla‘a Mahmiye-i İslâmbol’da Topkapısı dâhilinde Bâyezid Ağa mahallesinde sâkine ve zâtı vech-i şer‘î üzere mu‘arrefe olan Ümmügülsüm bt. Hasan nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb Ömer Beşe b. Mustafa nâm kimesne mahzarında ikrâr ve takrîr-i kelâm edip mezbûr Ömer Beşe zevcim olup lâkin beynimizde hüsn-i mu‘âşeretimiz olmamağla iki def‘a akidde müsemmâ zimmetinde mütekarrer ve ma‘kūdun-aleyh olan beş guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olup ve zevcim mezbûrun firâşından hâsılât ve benden mütevellidât hâlâ bi-hakkı’l-hıdâne hacr u terbiyemde olan sadriye kızlarım sekiz yaşında Zeliha ve dört yaşında Nâile ve bir yaşında Havva nâm sagīreleri dahi dokuz yaşlarını tekmîl edinceye değin kendi mâlından infâk ve iksâ etmek üzere zevcim mezbûr Ömer Beşe ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve sâire müte‘allika âmme-i de‘âvî ve kâffe-i mutâlebâtdan ben zevcim mezbûr Ömer Beşe’nin zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 21 min-C sene 1197 Şühûdü’l-hâl: Müezzin Molla Mustafa b. el-Hâc Yusuf, es-Seyyid Ali Beşe b. Süleyman, Mücellid Süleyman Ağa b. ( ), Berber Ali b. ( ), Molla Ali b. Halil.