Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 461 Hüküm no: 519 Orijinal metin no: [75b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraç Doğan mahallesinden Mehmed Nureddin Efendi’nin evlatlığı Hüseyin’e nafaka takdiri Tebennî-i sagīr Mahmiye-i İslâmbol’da Sarrâc Doğan mahallesinde sâkin kuzât-ı kirâmdan bâ‘isü hâze’l-kitâb es-Seyyid Mehmed Nureddin Efendi b. es-Seyyid Mehmed Ağa meclis-i şer‘-i hatîr-i lâzımü’t-tevkīrde takrîr-i kelâm ve bast-ı merâm edip hâlâ li-ecli’t-tebennî hacr u terbiyemde olan takrîben beş yaşında Hüseyin b. Abdullah nâm sagīrin mâlı olmayıp nafaka ve kisveye ihtiyâcı olmağla sagīr-i mezbûrun nafaka ve kisve-bahâsı içün men-lehû hakku’t-taleb ve’l-ahz üzerine kıbel-i şer‘den kad[r]-ı ma‘rûf meblağ farz ve takdîr olunmak matlûbumdur dedikde hakīkat-i hâl bi’l-cümle mukırr-ı mûmâ-ileyh Mehmed Nureddin Efendi’nin takrîr-i meşrûhu üzere olduğunu zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir olmağın hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi sagīr-i mezbûrun ber-vech-i muharrer nafaka ve kisve-bahâsı içün men-lehû hakku’t-taleb ve’l-ahz üzerine târih-i kitâbdan küllü yevm üçer para farz ve takdîr edip meblağ-ı mefrûz-ı mezkûru sagīr-i mezbûrun nafaka ve kisvesine harc ü sarfa ve lede’l-iktizâ istidâneye ve inde’z-zafer men-lehû hakku’t-taleb ve’l-ahz üzerine rücû‘a mûmâ-ileyh Mehmed Nureddin Efendi’ye izin vermeğin mâ-vaka‘a. Fî 22 min-C sene 1197 Şühûdü’l-hâl: Es-Seyyid Mehmed b. es-Seyyid İbrahim, Hasan Çavuş Ağa b. Mehmed, Osman Çavuş Ağa b. ( ), Hoca Salih Efendi b. ( ), es-Seyyid Hasan Ağa b. ( ), Molla Ali b. Halil.