Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 462 Hüküm no: 520 Orijinal metin no: [75b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Ağa, Mehmed Said Ağa ve Mehmed’in borçlarına karşılık Nefise Hatun’a verdikleri evi, parayı ödedikleri için geri aldıkları Fekk-i istiğlâl İşbu sebt-i kenâr olunan hüccet derûnunda mezkûretü’l-ism Nefise Hatun bt. Abdullah tarafından husûs-ı âti’l-beyânı ikrâra vekîl olduğu zât-ı mezbûreyi ârifân es-Seyyid Mehmed b. İbrahim ve Hasan Çavuş Ağa b. Mehmed nâm kimesneler şehâdetleriyle şer‘an sâbit olan fahrü’l-kuzât es-Seyyid Mehmed Nureddin Efendi b. es-Seyyid Mehmed meclis-i şer‘-i hatîr-i lâzımü’t-tevkīrde kezâlik derûn-ı hüccetde mezkûrûnü’l-ism işbu ashâbü’l-kitâb es-Seyyid Süleyman Ağa ve es-Seyyid Mehmed Said Ağa ve es-Seyyid Mehmed Tâhir Ağa evlâd-ı es-Seyyid Ahmed mahzarlarında bi’l-vekâle ikrâr ve takrîr-i kelâm edip mezbûrûn es-Seyyid Süleyman Ağa ve es-Seyyid Mehmed Said Ağa ve es-Seyyid Mehmed Tâhir Ağa bin yüz doksan senesi Muharremi’l-harâm’ının yirmi üçüncü günü müvekkilem mezbûre Nefise Hatun yedinden istidâne ve kabz eyledikleri cihet-i karzdan beş yüz guruş deynleri mukābelesinde yine derûn-ı hüccetde tahrîr ve tavsîf olunup ale’l-iştirâki’s-seviyy yedlerinde mülkleri olan bir bâb muhterik menzil arsalarını müvekkilem mezbûre Nefise Hatun’a bi-tarîki’l-istiğlâl bey‘ ve teslîm etmişler idi. El-hâletü hâzihî mezbûrûn es-Seyyid Süleyman Ağa ve es-Seyyid Mehmed Said Ağa ve es-Seyyid Mehmed Tâhir Ağa deyn-i meblağ-ı mezbûr beş yüz guruşu müvekkilem mezbûre Nefise Hatun’a edâ ve teslîm eylediklerinde ol dahi yedlerinden ahz ü kabz eyledikden sonra arsa-i mezkûreyi rehinden fekk ve mezbûrûna geri redd ü teslîm edip ol-vechile arsa-i mezkûre mezbûrûn es-Seyyid Süleyman Ağa ve es-Seyyid Mehmed Said Ağa ve es-Seyyid Mehmed Tâhir Ağa’nın ke’l-evvel mülk-i mahz ve hakk-ı sarîhleri olmuşdur dedikde gıbbe’t-tasdîki’ş-şer‘î mâ-vaka‘a. Fî 22 min-C sene 1197 Eş-şühûdü’s-sâbıkūn.