Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 463 Hüküm no: 521 Orijinal metin no: [75b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Ağa ve Mehmed Said Ağa’nın Sarraç Doğan mahallesindeki yanmış ev arsasındaki haklarını kardeşleri Mehmed Tâhir Ağa’ya sattıkları Fek olunan arsadan hisseyi yine hissedârına mübâya‘a şüd Mahmiye-i İslâmbol’da Sarrâc Doğan mahallesi ahâlisinden es-Seyyid Süleyman Ağa ve es-Seyyid Mehmed Said Ağa ibney es-Seyyid Ahmed nâm karındaşlar meclis-i şer‘-i şerîf-i enverde li-ebeveyn er karındaşları işbu bâ‘isü’l-kitâb es-Seyyid Mehmed Tâhir Ağa mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Usturacı Süleyman Ağa menzili ve bir tarafdan Ahmed Çavuş Ağa ve ba‘zan sağrıcı çırağı Mustafa Ağa menzilleri ve iki tarafdan tarîk-i âm ile mahdûd terbî‘an iki bin zirâ‘ muhterik mülk menzil arsasının üç sehm i‘tibârıyla birer sehmden iki sehm-i şâyi‘i bizim ve bir sehm-i şâyi‘i dahi karındaşımız mezbûr es-Seyyid Mehmed Tâhir Ağa’nın bâ-hüccet-i şer‘iye irsen yedimizde mülk ve hakkımız olmağın biz arsa-i mahdûde-i mezkûrede i‘tibâr-ı mezkûr üzere mâlikler olduğumuz iki sehm hisse-i şâyi‘amızı tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile karındaşımız mezbûr Mehmed Tâhir Ağa’ya beş yüz guruşa bey‘ ve temlik ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr beş yüz guruşu karındaşımız mezbûr es-Seyyid Mehmed Tâhir Ağa yedinden bi-kadri’l-hısas tamamen ahz ü kabz eyledik ba‘de’l-yevm arsa-i mahdûde-i mezkûrenin iki sehm-i şâyi‘inde bizim kat‘a alâka ve medhalimiz kalmayıp karındaşımız mezbûr es-Seyyid Mehmed Tâhir Ağa’nın müstakıllen mülk-i sahîh ve hakk-ı sarîhi olmuşdur dediklerinde gıbbe’t-tasdîki’ş-şer‘î mâ-vaka‘a. Fî 23 min-C Eş-şâhidûnü’s-sâbıkūn.