Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 464 Hüküm no: 523 Orijinal metin no: [76a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mimaracem mahallesinden Hadice bt. Mehmed’in boşandığı kocasına mehrini hibe edip ayrıca bir kısım eşyasını da sattığı Eşyâ mübâya‘ası Mahmiye-i İslâmbol’da Mi‘mâr Acem mahallesinde sâkine ve zâtı vech-i şer‘î üzere mu‘arrefe olan Hadice bt. Mehmed nâm hatun meclis-i şer‘-i şerîf-i enverde hâlâ zevci işbu bâ‘isü’l-kitâb el-Hâc Ahmed el-Bedevî b. Ali nâm kimesne mahzarında ikrâr ve takrîr-i kelâm edip zevcim mezbûr zimmetinde ma‘kūdun-aleyh olan beş guruş mehr-i müeccelim hibetü’d-deyn mimmen aleyhi’d-deyn sahîhatün fehvâsınca zevcim mezbûr el-Hâc Ahmed’e hibe ve temlik eylediğimde ol dahi ber-vech-i muharrer meclis-i hibede bilâ-mâni‘ ittihâb ve temellük ve kabûl eyledikden sonra eşyâ-i memlûkemden yün ve kıtık memlû dört beledî yasdık ve iki minder ve iki çit yorgan ma‘a çârşeb ve bir beledî döşek ma‘a çârşeb ve iki baş yasdığı ve bir kilim ve iki tencere ma‘a kapak ve iki sahan ve bir tâbe ve bir tepsi ve bir şorba tası ve iki hamam tası ve beş güllâc tâbesi ve iki müsta‘mel şali entari ve bir çuka ferâcemi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevcim mezbûr el-Hâc Ahmed’e kırk guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr kırk guruş mutâlebesinden zevcim mezbûr el-Hâc Ahmed’in zimmetini ibrâ-i âm ile ibrâ ve ıskāt eylediğimde ol dahi ibrâmı kabûl eyledi, ba‘de’l-yevm mehr-i mezkûr beş guruşdan zevcim mezbûr el-Hâc Ahmed’in zimmeti berî ve eşyâ-i muharrere-i mezkûre dahi mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 23 min-C sene 1197 Şühûdü’l-hâl: Molla Ali b. Halil, Salih b. Halil, Hacı Hasan b. Osman, Molla Mehmed b. Mustafa, Mustafa b. Mustafa.