Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 465 Hüküm no: 524 Orijinal metin no: [76a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Çavuş’un Hasan b. Mehmed’e Daday’ın Karaki köyünde bulunan ev bahçedeki hakkını satıp tarlalardaki hakkını da ferağ ettiği Anadolu’dan mübâya‘a-i emlâk ve tarla ferâğı Vilâyet-i Anadolu’da Kastamonu sancağında Daday kazâsına tâbi‘ Karaki karyesi ahâlisinden olup mahmiye-i İslâmbol’da Ma‘cûnîkasım mahallesinde sâkin Hüseyin Çavuş Ağa b. Mehmed nâm kimesne meclis-i şer‘-i şerîf-i enverde yine karye-i mezbûre ahâlisinden işbu bâ‘isü’l-kitâb Hasan b. Mehmed nâm kimesne mahzarında ikrâr ve takrîr-i kelâm edip karye-i mezbûrede vâki‘ iki tarafdan Sohta Molla Mehmed mülkü ve bir tarafdan Hadice Hatun tarlası ve bir tarafdan çay ile mahdûd ma‘lûmü’l-müştemilât bir bâb mülk menzil ile karye-i mezbûre hudûdu dâhilinde kâin ma‘lûmü’l-hudûd bir kıt‘a harman yeri ve bir samanhâne ve eşcâr-ı müsmireli bağçenin sekiz sehm i‘tibârıyla dört sehm-i şâyi‘i müşterî-i mezbûrun ve birer sehmden iki sehm-i şâyi‘i kız karındaşlarım Âişe ve Âlime hatunların ve iki sehm-i şâyi‘i benim yedimizde mülkümüz olmağın ben emlâk-i mezkûreden mâlik olduğum iki sehm hisse-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûr Hasan’a on guruşa bey‘ ve temlik ve yine karye-i mezbûrede mevâzi‘-i adîdede kâin ma‘lûmü’l-hudûd dokuz kıt‘a tarlaların nısfı mezbûr Hasan’ın ve nısf-ı âharı benim tasarrufumda olmağla ben tarla-yı mezkûrlardan nısf hissemi dahi bâ-ma‘rifet-i sâhib-i arz mezbûr Hasan’a meccânen ferâğ ve tefvîz ve her birini mahallerinde kabz ve zabta taslît eylediğimde ol dahi ber-vech-i muharrer iştirâ ve temellük ve tefevvüz ve kabûl eyledikden sonra semen-i mezkûr on guruş mutâlebesinden mezbûr Hasan’ın zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm emlâk-i mezkûrenin iki sehm-i şâyi‘inde benim kat‘a alâka ve medhalim kalmayıp mezbûr Hasan’ın mülk-i müşterâsı ve hakk-ı sarfı ve tarla-yı mezkûrlar dahi dâhil-i havza-i tasarrufu olmuşdur dedikde gıbbe’t-tasdîki’ş-şer‘î. Fî 24 min-C sene 1197 Şühûdü’l-hâl: Kargılıoğlu Ahmed b. Mehmed, el-Hâc Ali b. Hüseyin, Vezir Osmanoğlu Mehmed, el-Hâc Mustafa b. Hüseyin, el-Hâc Abdulkadir b. Hüseyin, Tiryâkioğlu Halil.