Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 465 Hüküm no: 525 Orijinal metin no: [76a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cafer Subaşı mahallesinden Fethi Hatun’un Atiyetullah Hanım’a bir miktar nakit para hibe edip bir kısım eşyasını da sattığı Eşyâ mübâya‘ası Mahmiye-i İslâmbol’da Cafer Subaşı mahallesinde sâkine ve zâtı vech-i şer‘î üzere mu‘arrefe olan Fethi Hatun bt. Abdullah meclis-i şer‘-i hatîrde kezâlik zâtı mu‘arrefe bâ‘isetü hâze’l-kitâb Atiyetullah Hanım bt. Mehmed Kemaleddin Efendi mahzarında ikrâr ve takrîr-i kelâm edip yedimde mâlım olan nakid yirmi guruşumu hibe-i sahîha-i şer‘iye ile mûmâ-ileyhâ Atiyetullah Hanım’a hibe ve temlik ve teslîm ve eşyâ-i memlûkemden iki minder ve dört yemeni baş yasdığı ve bir yanbolu kebesi ve bir yorgan ve bir Mısır hasırı ve bir entari ve bir zıbın ve iki gömlek ma‘a don ve bir çuka ferâce ve bir tencere bâ-kapak ve iki lenger ve bir sini ve bir sepet sandığımı tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mûmâ-ileyhâ Atiyetullah Hanım’a yirmi guruşa bey‘ ve temlik ve teslîm eylediğimde ol dahi ber-vech-i muharrer ittihâb ve iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr yirmi guruş mutâlebesinden mûmâ-ileyhânın zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm nakd-i merkūm yirmi guruş mûmâ-ileyhâ Atiyetullah Hanım’ın mülk-i mevhûbu ve eşyâ-i muharrere-i mezkûre dahi mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mukırre-i mezbûre Fethi Hatun yine meclis-i şer‘de mûmâ-ileyhâ mahzarında i‘âde-i kelâm edip mûmâ-ileyhâ Atiyetullah Hanım ile mahalle-i mezbûrede vâki‘ mâ‘an sâkine olduğum menzilde mevcûde bisât-ı beyt ve evân-ı nühâsiye ve gayr-ı nühâsiye ve bi’l-cümle eşyâ mûmâ-ileyhâ Atiyetullah Hanım’ın mâlı ve mülkü olup benim kat‘a alâka ve medhalim yokdur dedikde mâ-vaka‘a bi’t-taleb. Fî 23 min-C sene 1197 Şühûdü’l-hâl: Müezzin İsmail Efendi b. Hüseyin, Molla Mehmed b. Osman, Oturakçı İsmail b. Abdullah, Koltukçu es-Seyyid Mehmed Ağa b. Ömer, Molla İsmail.