Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 466 Hüküm no: 526 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzun Yusuf mahallesinden Halime bt. Mehmed ile Ali Beşe’nin boşandıkları Muhâla‘a Mahmiye-i İslâmbol’da Uzun Yusuf mahallesinde sâkine ve zâtı vech-i şer‘î üzere mu‘arrefe olan Halime bt. Mehmed nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb es-Seyyid Ali Beşe b. es-Seyyid Mustafa nâm kimesne mahzarında ikrâr ve takrîr-i kelâm edip mezbûr es-Seyyid Ali Beşe zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan yirmi beş guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr es-Seyyid Ali Beşe ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvî ve kâffe-i mutâlebâtdan her birimiz âharın zimmetini ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î. Fî 24 min-C sene 1197 Şühûdü’l-hâl: Ali Efendi b. Mehmed, Müezzin Halil Efendi, Dikici Mehmed Beşe, Molla Ali b. Halil, Salih b. Halil.