Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 249 Hüküm no: 205 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefer Mehmed Bey’in Mehmed Salih’deki alacağını tahsili Ma‘rûz, Derûn-ı arzuhâlde mezkûrü’l-ism Asâkir-i Hâssa-i Şâhâne miralaylarından olup bin iki yüz elli beş senesi şehr-i Rebî‘ülevveli’nin beşinci günü Anadolu’da Malatya kazâsında Nizib nâm mahâlde esnâ-i muhârebede fevt olduğu sikāt-ı Müslimînden Yüzbaşı Mehmed Ağa b. İbrahim ve Ahıskavî Esirci Mehmed Emin Ağa b. Mehmed nâm kimesneler ihbârlarıyla zâhir olan Mehmed İzzet Bey’in min-ciheti’l-usûbeti’n-nesebiye ber-vech-i âtî vârisi olduğunu iddi‘â eden Sefer Mehmed Bey b. Hüseyin Bey b. Ali Paşa’nın sulbî mahdûmu ve tarafından husûs-ı âti’l-beyânda vekîl olduğu Ahmed Ağa b. Mehmed ve Mehmed Ağa b. İsmail nâm kimesneler şehâdetleriyle mahzar-ı hasm-ı câhidde ber-nehc-i şer‘î sâbit ve sübût-ı vekâletine hükm-i şer‘î lâhık olan sâhib-i arzuhâl Hamdi Bey Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde müteveffâ-yı mûmâ-ileyh Mehmed izzet Bey zevce-i menkûha-i metrûkesi Şerife Fâtıma Hanım’ın pederi ve tarafından vekîl-i sâbitü’l-vekâlesi es-Seyyid Süleyman Şükrü Ağa b. es-Seyyid İbrahim hâzır olduğu hâlde Mehmed Salih Ağa b. Mehmed muvâcehesinde müteveffâ-yı mûmâ-ileyh Mehmed İzzet Bey’in babası Ali Bey pederim ve müvekkilim mûmâ-ileyh Sefer Mehmed Bey’in babası merkūm Hüseyin Bey ile li-ebeveyn er karındaşları olup babaları ismi müşârün-ileyh Ali Paşa ve dedeleri ismi el-Hâc Hasan Ağa ve vâlideleri ismi Fâtıma Hatun bt. Abdullah ve maskat-ı re’sleri Trabzon sancağında vâki‘ Gönye kazâsına tâbi‘ Makri karyesi olup ol vechile pederim ve müvekkilim mûmâ-ileyh müteveffâ-yı merkūm Mehmed İzzet Bey’in li-ebeveyn ammi oğlu olmağla verâseti zevcesi müvekkile-i merkūme ile usûbet-i nesebiye cihetinden pederim müvekkilim mûmâ-ileyhe münhasıra olup bunlardan gayrı vârisi ve terekesine müstehakk-ı âharı olmamağla müteveffâ-yı merkūm, mezbûr Mehmed Salih Ağa zimmetinde cihet-i deyn-i şer‘îden üç yüz guruş hayatında mezbûr Mehmed Salih Ağa’dan kable’l-ahz ve’l-istîfâ fevt ve meblağ-ı mezkûr zevcesi müvekkile-i merkūme ile pederim müvekkilim mûmâ-ileyhe mevrûs olmağla meblağ-ı mezkûr üç yüz guruşdan pederim müvekkilim mûmâ-ileyhin hisse-i irsiye-i şer‘iyyesini bi’l-vekâle taleb ederim, suâl olunsun dedikde, merkūm Mehmed Salih Ağa dahi cevâbında müteveffâ-yı merkūme cihet-i merkūme üç yüz guruş deyni olduğunu ikrâr, lâkin müvekkil-i mûmâ-ileyh Sefer Mehmed Bey’in verâseti ma‘lûmum değildir deyü müdde‘î-i vekîl-i merkūmun ber-vech-i muharrer verâset müdde‘âsını inkâr edicek müdde‘î ve kebîr-i merkūm ber-vech-i muharrer verâset müdde‘âsını herbiri mahallerinde lede’t-tezkiye adl ve makbûlü’ş-şehâde idükleri ihbâr olunan Hasan Ağa b. Süleyman ve Ahmed Ağa b. Mustafa nâm kimesneler şehâdetleriyle bi’l-muvâcehe vech-i şer‘î üzere isbât etmeğin mûcebince müvekkil-i mûmâ-ileyh es-Seyyid Mehmed Bey’in verâsetine ba‘de’l-hükm meblağ-ı mezkûr üç yüz guruşdan müvekkil-i mûmâ-ileyhin hisse-i irsiye-i şer‘iyyesi oğlu müdde‘î-i mûmâ-ileyh vekîl-i merkūm Hamdi Bey’e edâ ve teslîme merkūm Mehmed Salih Ağa’ya tenbîh olunduğu huzûr-ı [âlîlerine i‘lâm olundu]. Fî 23 R sene [12]57.