Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 467 Hüküm no: 528 Orijinal metin no: [76b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Es-Seyyid Ömer mahallesinden Hammâmî Ahmed Ağa’nın henüz tamamlanmamış evini, arsa ve vakıf arsasını Hasan Ağa’ya sattığı Kafes arsa nâ-tamam menzil mübâya‘ası ve bir mikdâr vakıf arsayı dahi bâ-ma‘rifet-i mütevellî ferâğ ve tefvîz Mahmiye-i İslâmbol’da es-Seyyid Ömer mahallesinde sâkin Hamâmî es-Seyyid Ahmed Ağa b. es-Seyyid Mustafa meclis-i şer‘-i hatîr-i lâzımü’t-tevkīrde bâ‘isü hâze’l-kitâbi’l-müstetâb el-Hâc Hasan Ağa b. Ali mahzarında ikrâr ve takrîr-i kelâm edip mahalle-i mezbûrede vâki‘ bir tarafdan ba‘zen Âişe Hatun ve ba‘zen Koltukçu Mehmed Beşe ve ba‘zen Abdullah Ağa ve ba‘zen Halebli Şeyh Mehmed ve ba‘zen Çukadâr Hasan ve ba‘zen Haleblioğlu ( ) ve ba‘zen Yağlıkçı Hacı Abdullah Efendi ve ba‘zen Hasan Efendi arsaları ve bir tarafdan Torun Ali Çavuşzâde bağçesi ve bir tarafdan tarîk-i hâs ve ba‘zen Arab Ahmed ve ba‘zan Dikici Kara Mehmed arsaları ve bir tarafdan tarîk-i âm ile mahdûd kafes ta‘bîr olunur nâ-tamam fevkānî dört bâb oda ve sofa ve dîvânhâne ve dehliz ve tahtânî üç bâb oda ve bağçe ve bir kârgîr taş oda ve bir mahzen ve üç bi’r-i mâ ve etrâf-ı erba‘adan taş duvarı müştemil bir bâb menzilin tarîk-i âm cânibinden mezbûr Hasan Efendi arsasına muttasıl yüz yirmi zirâ‘ mahâlli Hüseyin Efendi Vakfı’ndan yevmî bir akçe icâre-i müeccele ile taht-ı tasarrufumda ve mâ‘adâ bi’l-cümle arsa ve ebniye-i mezkûre akd-i âti’z-zikrin sudûruna değin şirâen yedimde mülk ve hakkım olmağın ben zikr olunan arsa ve ebniye-i memlûkemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile mezbûr Hasan Ağa’ya iki bin iki yüz elli guruşa bey‘ ve temlik ve teslîm ve vakıf olan mahâllini dahi iki yüz elli guruş bedel mukābelesinde bâ-ma‘rifet-i mütevellî ferâğ-ı mu‘teber-i kat‘î ile ferâğ ve tefvîz eylediğimde ol dahi ber-vech-i muharrer iştirâ ve temellük ve tesellüm ve tefevvüz ve kabûl eyledikden sonra semen-i mezkûr iki bin iki yüz elli guruş ile bedel-i merkūm iki yüz elli guruş ki cem‘an iki bin beş yüz guruşu mezbûr Hasan Ağa yedinden tamamen ahz ü kabz eyledim, ba‘de’l-yevm menzil-i mahdûd-ı mezkûrun arsa ve bi’l-cümle ebniye-i mezkûresi mezbûr Hasan Ağa’nın mülk-i müşterâsı ve vakıf olan mahâlli dahi dâhil-i havza-i tasarrufu olup benim kat‘a alâka ve medhalim kalmamışdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a. Fî 21 min-C sene 1197 Şühûdü’l-hâl: Mehmed Emin Efendi b. Mehmed imâm-ı mahalle-i mezbûre, Hafız Mustafa Efendi b. Mehmed imâm-ı sânî-i Davudpaşa, Mustafa Efendi b. Hasan Ağa, Bostânî Mehmed Ağa b. İbrahim, Molla Ali b. Halil, Ali b. Mehmed, Hacı Mehmed b. Abdullah, Çukadâr Ali b. Abdullah, Hamza Ağa b. Halil.