Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 251 Hüküm no: 206 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hanım Hatun’un varislerinin miras iddiasında bulunmaktan men olunması Ma‘rûz, Medîne-i Üsküdar’da Atîk Vâlide Sultan Câmi‘-i şerîfi hudûdu dâhilinde Debbâğlar mahallesinde sâkine iken bin iki yüz elli altı senesi şehr-i Rebî‘ülevveli hilâlinde vefât eden Fâtıma Hanım bt. el-Hâc Mehmed Emin b. Veliyyüddin’in verâseti zevc-i metrûku ketebeden Hafız Mehmed Şükrü Efendi b. Mustafa ile li-ebin karındaşları Hüseyin Hüsnü Efendi ve Mustafa Raşid Efendi ve İbrahim Edhem Efendi ve sagīr Mehmed Emin ve sagīre Hesna Safiye’ye ba‘de’l-inhisâr verese-i merkūmûndan ashâb-ı arzuhâl merkūmûn Hüseyin Hüsnü Efendi ve Mustafa Raşid Efendi ve İbrahim Edhem Efendi taraflarından husûs-ı âti’l-beyânda vekîl-i müseccel-i şer‘îleri mu‘arrefetü’z-zât Âişe Sıdıka bt. Mehmed ve sagīrân-ı mezbûrânın vâlideleri ve tesviye-i umûrlarına bâ-hüccet vasiyy-i mansûbeleri kezâlik zâtı mu‘arrefe Nimetullah bt. İsmail nâm hatunlar bi’l-ma‘iyye rü’yete memûr evkāf müfettişi fazîletlü semâhatlü es-Seyyid Mehmed Emin Âsaf Efendi hâzır olduğu hâlde evvelâ bi’d-defa‘ât Salı günleri huzûr-ı hazret-i fetvâ-penâhîde ve ba‘dehu bi’t-terâzî medîne-i mezbûre mahkemesinde meclis-i şer‘-i münîrde derûn-ı arzuhâlde mezkûrü’l-ism zevc-i merkūm Hafız Mehmed Şükrü Efendi muvâcehesinde müteveffât-ı mezbûrenin terekesinden hâric-ez defter-i kassâm mecmû‘u otuz bin guruş kıymetli bir kıt‘a mushaf-ı şerîf ve üç aded elmas iğne ve bir elmas yüzük ve bir çift elmaslıca zümrüd küpe ve bir incili nüsha ve bir elmas mâşâallâh ve on sîm zarf ve bir sîm mir’ât ve bir sîm sagīr çekmece ve Üsküdar çatması kıtık memlû yasdık ve dört minder ve üç nîm çuka mak‘ad ve üç minder şilte mak‘adı ve iki koltuk yasdığı ve yedi basma pencere perdesi ve bir mavi çuka kapı perdesi ve her biri a‘lâ harçlı ve biri Şatranc-ı gülmez ta‘bîr olunur şâlî ve çubuklu lâciverdî Hind şâlîsi ve biri ipekli işleme ki dört aded anteri ve bir marinoz kaplı kısa nâfe kürk ve üç marinoz kaplı kısa samur kürk ve bir mavi çuka ferâce ve ikisi mavi ve biri sarı üç canfes şalvar ve biri göğez ve biri beyaz iki lâciverd çubuklu şal ve iki basma döşek ve iki şilte çıtalı ta‘bîr olunur iki kırmızı yorgan ma‘a çârşeb ve bir şâlî çiçekli yorgan ma‘a çârşeb ve bir mavi gezi şalvar ve bir salkım harçlı atlas hırka ve biri altı parmak ve biri İstanbul şâlîsi ve üçü beyaz dülbend ki cem‘an beş anteri ve biri beyaz işleme ve biri yeşilli ve biri siyah işleme ve biri beyaz dülbend ki üç boğça ve iki işleme canfes yüz yasdığı ve üç beyaz yüz yasdığı ve bir sofra ve bir fûta peşkir ve on iki makrama ve on sahan ma‘a kapak ve bir tencere ma‘a kapak ve bir mangal ma‘a tahta ve bir leğen ma‘a ibrik ve bir sagīr pirinç sini ve bir âbdest leğeni ve bir şorba tası ma‘a kapağı zevc-i merkūm Hafız Mehmed Şükrü Efendi müstakıllen zabt ve vaz‘-ı yed etmekle huliyyât ve eşyâ-i muharrere-i mezkûre ile müteveffât-ı mezbûrenin merkūm Hafız Mehmed Şükrü Efendi zimmetinde mütekarrir ve ma‘kūdün-aleyh mehr-i müeccelinden bâkī bin guruşdan müvekkilûn-ı merkūmûn Hüseyin Hüsnü Efendi ve Mustafa Raşid Efendi ve İbrahim Edhem Efendi ile sagīrân-ı mezbûrânın hisse-i irsiyelerini bi’l-vekâle ve bi’l-vesâye merkūm Hafız Şükrü Efendi’den taleb ederiz deyü da‘vâ etdiklerinde merkūm Hafız Mehmed Şükrü Efendi dahi cevâbında zikr olunan mushaf-ı şerîf ve huliyyât ve eşyâ-i mezkûreye vaz‘-ı yedini ve mehr-i müeccele-i mezkûru ikrâr, lâkin işbu yedimde olup bin iki yüz elli beş senesi Zilhicceti’-şerîfesi’nin yirmi sekizinci günü târîhiyle müverraha ve ol târîhde medîne-i mezkûre kādısı bulunan mevâlî-i i‘zâmdan Manyasîzâde fazîletlü Lütfullah Efendi’nin imzâsıyla mümzât ve hatemiyle mahtûm bir kıt‘a hüccet-i şer‘iyye nâtıka olduğu üzere kıbel-i şer‘den me’zûnen irsâl olunan Kâtib Hafız Mehmed Asım Efendi’nin mahalle-i mezbûrede vâki‘ zevcem mezbûre ile hayatında ma‘an sâkinler olduğumuz pederim merkūm Mustafa’nın menzilinde huzûr-ı Müslimînde akdeylediği meclis-i şer‘de zevcem mezbûre Fâtıma Hanım hâl-i hayatında ve kemâl-i akl ü sıhhatinde ber-vech-i muharrer zimmetimde mütekarrir ve ma‘kūdün-aleyh mehr-i müeccelden hakkı olan bin iki yüz guruşun iki yüz guruşunu yedimde ibkā ve mâ‘adâ bin guruşu ile zikr olunan huliyyât ve eşyâdan bir kıt‘a mushaf-ı şerîf ve üç elmas iğne ve bir elmas yüzük ve bir çift küpe ve bir nüsha? ve bir mâşâallah ve on zarf ve bir mir’ât ve bir sîm çekmecesini bana hibe-i sahîha-i şer‘iyye ile hibe ve temlîk ve teslîm eylediğinde ben dahi meclis-i hibede bilâ-mâni‘ ittihâb ve temellük ve tesellüm ve kabz ve kabûl ve mâ‘adâ eşyâ-i muharrere-i mezkûreyi dahi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile dört bin guruşa bana bey‘ ü temlîk ve teslîm eylediğinde ben dahi ber-vech-i muharrer iştirâ ve temellük ve tesellüm ve kabz ve kabûl edip semeni olan meblağ-ı merkūm dört bin guruş mutâlebesine müte‘allika da‘vâdan benim zimmetimi kabûlümü hâvî ibrâ ve iskāt edip fîmâ-ba‘d mehr-i müeccele-i merkūmun bin guruşla zikirleri mürûr eden mushaf-ı şerîf ve huliyyât ve eşyâda zevcem merkūmenin kat‘an alâka ve medhali kalmayıp mevhûbe ve müşterâ emvâlim ve hakk-ı sırfım olmağla bi-hakkın vaz‘-ı yed ederim deyü ba‘de’d-def‘ ve’l-inkâr dâfi‘-i merkūm Hafız Mehmed Şükrü Efendi ber-vech-i muharrer def‘-i meşrûhunu ve mazmûn-ı hüccet-i mezkûreyi lede’t-tezkiye adl ve kabûlü’ş-şehâde idükleri ihbâr olunan zeyl-i hüccetde isimleri mezkûr mahalle-i mezbûre imâmı es-Seyyid Abdullah Efendi b. Ali ve es-Seyyid Mustafa Sabri Efendi b. es-Seyyid Mehmed ve zu‘amâdan es-Seyyid Mehmed Esad Ağa b. Mehmed ve Kalaycı el-Hâc Feyzullah Ağa b. Mustafa nâm kimesneler şehâdetleriyle mahâllinde irâe ederek bi’l-muvâcehe vech-i şer‘î üzere isbât etmeğin mûcebince mezbûretân Âişe Sıdıka ve Nimetullah hatunlar bi’l-vekâle ve bi’l-vesâye da‘vâ-yı mezkûreleriyle merkūm Hafız Mehmed Şükrü Efendi’ye bî-vech-i şerî‘î mu‘ârazadan men‘ olundukları tescîl ve huzûr-ı âlîlerine i‘lâm olundu. El-emru li-men-lehü’l-emr. Fi’l-yevmi’l-hâmis min-şehri Rebî‘i’l-evvel li-sene seb‘a ve hamsîn ve mi’eteyn ve elf.