Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 476 Hüküm no: 541 Orijinal metin no: [78a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzun Yusuf mahallesinden Mustafa Ağa yanmış ev arsasının bir kısmını Abdullah Ağa’ya satıp parasını da aldığı borca karşılık Abdullah Ağa’ya verdiği Mülk arsadan bir mikdârını ba‘de’l-ifrâz mübâya‘a ve semenini ve deyne takas Mahmiye-i İslâmbol’da Uzun Yusuf mahallesinde sâkin Mustafa Ağa b. Musa nâm kimesne meclis-i şer‘-i şerîf-i enverde işbu bâ‘isü’l-kitâb el-Hâc Abdullah Ağa b. Salih nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahmiye-i mezbûrede Koruk Mahmud mahallesinde vâki‘ bir tarafdan Memiş Efendi bağçesi ve bir tarafdan es-Seyyid Ali arsası ve bir tarafdan benim dâhiliye ta‘bîr olunur mukāta‘alı arsa ve bir tarafdan tarîk-i âm ile mahdûd ve terbî‘an yedi yüz elli altı zirâ‘ bir bâb muhterik mülk menzil arsasının üç yüz altmış üç zirâ‘ mahâllini ifrâz ve alâmât-ı fâsıla vaz‘ıyla ba‘de’l-imtiyâz tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr el-Hâc Abdullah Ağa’ya yedi yüz on guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yedi yüz on guruşu bundan akdem mezbûr el-Hâc Abdullah Ağa yedinden müstedân ve makbûz cihet-i karzdan yedi yüz on guruş deynime [78b] takas ve mahsûb eylediğimde ol dahi mukāssa ve kabûl etmeğin ol-vechile deyn-i mezkûr yedi yüz on guruşdan zimmetim berî ve zikr olunan üç yüz üç zirâ‘ arsa mezbûr el-Hâc Abdullah Ağa’nın mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î. Fî 27 min-C sene 1197 Şühûdü’l-hâl: Osman Efendi b. Mehmed, Müezzin Mustafa b. Mustafa, Ahmed Bey b. Hasan, el-Hâc Süleyman b. Mehmed, Berber Hasan, Musa b. Mustafa, Hüseyin b. el-Hâc Hüseyin, Kahveci Osman Usta b. ( ) ve gayruhum.