Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 477 Hüküm no: 542 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzun Yusuf mahallesinden Mustafa Ağa yanmış ev arsasının bir kısmını Osman Ağa’ya satıp parasını da aldığı borca karşılık yine Osman Ağa’ya verdiği Mukaddem ifrâz olunan arsadan yine bir mikdâr mahâllini ba‘de’l-ifrâz mübâya‘a ve semenini deyne takas Mahmiye-i İslâmbol’da Uzun Yusuf mahallesinde sâkin Mustafa Ağa b. Musa meclis-i şer‘-i hatîrde işbu bâ‘isü’l-kitâb Osman Ağa b. Veliyüddin mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahmiye-i mezbûrede Koruk Mahmud mahallesinde vâki‘ bir tarafdan Memiş Efendi bağçesi ve bir tarafdan es-Seyyid Ali arsası ve bir tarafdan benim dâhiliye ta‘bîr olunur mukāta‘alı arsam ve bir tarafdan tarîk-i âm ile mahdûd terbî‘an yedi yüz elli altı zirâ‘ bir bâb muhterik mülk menzil arsasının üç yüz elli dört buçuk zirâ‘ mahâllini ifrâz ve alâmât-ı fâsıla vaz‘ıyla ba‘de’l-imtiyâz tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Osman Ağa’ya beş yüz seksen bir guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr beş yüz seksen bir guruşu bundan akdem mezbûr Osman Ağa yedinden müstedân ve makbûz cihet-i karzdan beş yüz seksen bir guruş deynime takas ve mahsûb eylediğimde ol dahi mukāssa ve kabûl etmeğin ol-vechile deyn-i mezkûr beş yüz seksen bir guruşdan zimmetim berî ve zikr olunan üç yüz elli dört buçuk zirâ‘ arsa mezbûr Osman Ağa’nın mülk-i müşterâsı ve hakk-ı sarfı olup benim kat‘a alâka[m] kalmamışdır dedikde gıbbe’t-tasdîki’ş-şer‘î. Fî 27 min-C sene 1197 Eş-şâhidûnü’s-sâbıkūn.