Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 478 Hüküm no: 543 Orijinal metin no: [78b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kozlu mahallesinden Sima bt. Avanes’in yanmış ev arsasını hayır sahibi Ahmed Ağa’nın Davudpaşa Camii kürsü ve cihat-ı saire vakfına sattığı Vakfa mübâya‘a Mahrûse-i Galata’ya muzâfe Beşiktaş kasabasına tâbi‘ Ortaköy mahallâtından Kozlu mahallesinde mütemekkine ve şahsı ta‘rîf-i şer‘î ile mu‘arrefe Sima bt. Avanes nâm Nasrâniye meclis-i şer‘-i şerîf-i enverde el-Hâc Ahmed Ağa nâm sâhibü’l-hayrın mahmiye-i İslâmbol’da Davudpaşa Câmi‘-i şerîfine mevzû‘ kürsi ve cihât-ı sâire vakfının ber-vech-i meşrûta mütevellîsi bâ‘isü’l-kitâbi’l-müstetâb Hüseyin Efendi b. el-Hâc Ali tarafından vekîl-i müseccel-i şer‘îsi Süleyman Çavuş Ağa b. İsmail mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahalle-i mezbûrede vâki‘ bir tarafdan Dimitri zimmî arsası ve bir tarafdan Avanes zimmî odaları ve bir tarafdan Pekmezoğlu sarrâf bağçesi ve bir tarafdan tarîk-i âm ile mahdûd terbî‘an ( ) zirâ‘ bir bâb muhterik mülk menzil arsamı enkāz-ı mevcûdesiyle tarafeynden îcâb ve kabûlü hâvî bey‘-i bâtt-ı sahîh-i şer‘î ile vakıf içün mütevellî-i müvekkil-i mûmâ-ileyh Hüseyin Efendi’ye yüz guruşa bey‘ ve teslîm eylediğimde ol dahi ber-vech-i muharrer bi’t-tevliye iştirâ ve tesellüm ve kabûl eyledikden sonra semeni olan meblağ-ı mezbûr yüz guruşun otuz guruşunu nukūd-ı vakf-ı mezbûrdan olmak üzere mütevellî-i müvekkil-i mûmâ-ileyh yedinden ahz ü kabz ve mâ‘adâ yetmiş guruşunu yedinde ibkā edip arsa-i mahdûde-i mezkûre vakf-ı merkūm müsakkafâtından oldukdan sonra mütevellî-i müvekkil-i mûmâ-ileyh Hüseyin Efendi taraf-ı vakıfdan yedime i‘tâ eylediği bir kıt‘a temessük mantûkunca arsa-i mahdûde-i mezkûreyi yetmiş guruş icâre-i mu‘accele ve beher şehr akçe icâre-i müeccele ile bi’t-tevliye bana îcâr ve teslîm ve semen-i mezkûrdan ibkā eylediğim yetmiş guruşu mu‘accele-i mezkûre yetmiş guruşa takas ve mahsûb eylediğinde ben dahi ber-vech-i muharrer istîcâr ve tesellüm ve mukāssa ve kabûl edip mebî‘-i mezkûrun gabn ve tağrîrine ve mu‘accele-i merkūmenin adem-i istifâsına müte‘allika âmme-i de‘âvîden cânib-i vakf-ı merkūm ile zimmet-i mütevellî-i müvekkil-i mûmâ-ileyhi ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîki’ş-şer‘î mâ-vaka‘a. Fî 27 min-C sene 1197 Şühûdü’l-hâl: Molla Ali b. Halil, Salih b. Halil, Hacı Hasan b. Osman, Mustafa b. Mustafa.