Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 479 Hüküm no: 544 Orijinal metin no: [78b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bucakbağı mahallesinden Hafize Hatun ile Mehmed Said Ağa’nın bostanlarını Hadice bt. Ali’ye istiğlal yoluyla sattıkları Mülk bostan istiğlâli Mahmiye-i İslâmbol hısnı ebvâbından Yedikulesi dâhilinde Bucakbağı mahallesinde sâkin kendi nefsinden asîl ve li-ebeveyn kız karındaşı Hafize Hatun bt. el-Hâc Ali tarafından husûs-ı âti’l-beyânda vekîl olduğu zâtını ârifân es-Seyyid Hüseyin Ağa b. es-Seyyid Hasan ve Abdi b. Cafer nâm kimesneler şehâdetleriyle şer‘an sâbit olan Mehmed Said Ağa vekâleten meclis-i şer‘-i şerîf-i enverde mu‘arrefetü’z-zât işbu bâ‘isetü’l-kitâb Hadice bt. Ali nâm hatun mahzarında bi’l-asâle ve bi’l-vekâle ikrâr ve takrîr-i kelâm edip mahalle-i mezbûrede vâki‘ bir tarafdan Naili Paşa kerîmesi Âkıle Hanım bostanı ve bir tarafdan cidâr-ı hısn ve bir tarafdan Mehmed Emin Efendi veresesi bostanı ve bir tarafdan tarîk-i âm ile derûnunda bir bi’r-i mâ ve bir bağçevân odası ve bir âhûru müştemil bir bâb mülk bostanın üç sehm i‘tibârıyla iki sehm-i şâyi‘i benim ve bir sehm-i şâyi‘i kız karındaşım müvekkilem mezbûre Hafize Hatun’un bâ-hüccet-i şer‘iye irsen yedimizde mülk ve hakkımız olmağın ben bostan-ı mahdûd-ı mezkûru mezbûre Hadice Hatun’a bi-tarîki’l-istiğlâl yedi yüz guruşa bi’l-asâle ve bi’l-vekâle bey‘ ve teslîm eylediğimde ol dahi ber-vech-i muharrer iştirâ ve tesellüm ve kabûl eyledikden sonra meblağ-ı mezbûr yedi yüz guruşu mezbûre Hadice Hatun yedinden bi’l-asâle ve bi’l-vekâle bi-kadri’l-hısas tamamen ahz ü kabz eylediğimden sonra mezbûre Hadice Hatun bostan-ı mahdûd-ı mezkûru gıbbe’t-tahliyeti’ş-şer‘iye ve’t-tekābuzi’l-mer‘î târih-i kitâbdan beher şehr dokuzar guruş ücret tesmiyesiyle benimle kız karındaşım müvekkilem mezbûre Hafize Hatun’a îcâr ve teslîm eyledikde ben dahi bi’l-asâle ve bi’l-vekâle istîcâr ve tesellüm ve kabûl eyledim dedikde gıbbe’ş-şer‘î mâ-vaka‘a bi’t-taleb. Fî 28 min-C sene 1197 Şühûdü’l-hâl: İmâm Mustafa Efendi, el-Hâc Ahmed Ağa b. Mehmed, Sandalcı İsmail Ağa, Molla Ali b. Halil, es-Seyyid Hüseyin Ağa b. es-Seyyid Hasan, Abdullah b. Cafer.