Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 480 Hüküm no: 545 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimpaşa mahallesinde peşpeşe vefat eden Mehmed Ukayl ile hanımı Rabia’nın terekesinden kalan kısmı elinde bulunduran Ahmed’in bu kısmı mirasçılara dağıttığı Mîrâsdan ibrâ Mahmiye-i İslâmbol’da Silivrikapısı dâhilinde İbrahim Paşa mahallesinde sâkinler iken bundan akdem müte‘âkıben vefât eden eş-Şeyh Mehmed Ukayl b. Abdullah ve Rabia bt. Abdullah nâm zevcanın verâsetleri sulbî kebîr oğulları Ahmed ve Abdullah ve Abdulkadir nâm kimesneler ile sulbiye kebîre kızları Zeyneb Hatun’a münhasıra ve mesele-i mîrâsları yedi sehm i‘tibârıyla ikişer sehmden cem‘an altı sehmi oğulları mezbûrûn Ahmed ve Abdullah ve Abdulkadir’e ve bir sehmi kızları mezbûre Zeyneb Hatun’a isâbeti tahakkukundan sonra mezbûrân Abdullah ve Abdulkadir asâleten ve mezbûre Zeyneb Hatun’un zevci ve tarafından husûs-ı âti’l-beyânı ikrâra vekîl olduğu zâtını ârifân el-Hâc Mehmed b. Mustafa ve diğer Abdulkadir b. Mehmed nâm kimesneler şehâdetleriyle şer‘an sâbit olan Mustafa b. İbrahim nâm kimesne vekâleten meclis-i şer‘-i şerîf-i enverde tereke-i müteveffiyân-ı mezbûrâna bi’l-verâse vâzı‘ü’l-yed olan işbu bâ‘isü’l-kitâb mezbûr Ahmed mahzarında her biri bi’l-asâle ve bi’l-vekâle ikrâr ve takrîr-i kelâm edip mezbûr Ahmed müteveffiyân-ı mezbûrânın terekeleri esmânından hâsıl ba‘de ihrâci’l-mesârifi’l-lâzıme sahhu’l-bâkī yüz guruşuna bi’l-verâse vâzı‘ü’l-yed olmağla mezbûr Ahmed’in ber-vech-i muharrer vâzı‘ü’l-yed olduğu meblağ-ı mezbûr yüz guruşu beynimizde alâ mâ-farazallâhu te‘âlâ tevzî‘ ve taksîm ve her birimiz i‘tibâr-ı mezkûr üzere hisse-i irsiye-i ma‘lûmemizi ahz ü kabz edip hukūk-ı mîrâsa ve sâire müte‘allika âmme-i de‘âvî ve kâffe-i mutâlebâtdan mezbûr Ahmed’in zimmetini bi’l-asâle ve bi’l-vekâle ibrâ ve ıskāt eylediğimizde ol dahi ibrâmızı kabûl eyledi dediklerinde gıbbe’t-tasdîki’ş-şer‘î mâ-vaka‘a bi’t-taleb. Fî-gurrei Recebi’l-ferd sene 1197 Şühûdü’l-hâl: İmâm Ömer Efendi b. Mehmed, Müezzin Abdi Efendi b. Mehmed, Müezzin Veliyüddin Efendi b. Mustafa, Kovacı Mustafa Beşe b. Mehmed, Taşcı İbrahim Beşe, Mehmed Odabaşı, Koltukçu Ali Ağa, Molla Ali b. Halil ve gayruhum.