Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 480 Hüküm no: 546 Orijinal metin no: [79a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Sultan mahallesinden Hacce Hadice ile kardeşi Süleyman Ağa’nın yanmış ev arsalarını İbrahim Çavuş’a sattıkları Mülk arsa mübâya‘ası ve vakıf arsanın havasını bâ-ma‘rifet-i mütevellî mülk olunmak üzere mübâya‘a Mahmiye-i İslâmbol’da Topkapısı dâhilinde Fatıma Sultan mahallesinde sâkin kendi nefsinden asîl ve li-ebeveyn kız karındaşı Hacce Hadice Hatun bt. Abdulkadir tarafından husûs-ı âti’l-beyânda vekîl olduğu zâtını ârifân Musa b. Mustafa ve Mustafa b. Mehmed nâm kimesneler şehâdetleriyle şer‘an sâbit olan Süleyman Ağa meclis-i şer‘-i hatîr-i lâzımü’t-tevkīrde işbu bâ‘isü’l-kitâb İbrahim Çavuş Ağa b. İbrahim nâm kimesne mahzarında ikrâr ve takrîr-i kelâm edip mahmiye-i mezbûrede Koruk Mahmud mahallesinde vâki‘ bir tarafdan es-Seyyid Ali Çavuş zevcesi menzili ve bir tarafdan Mehmed Beşe menzili ve iki tarafdan tarîk-i âm ile mahdûd iki bi’r-i mâ ve zikr olunan es-Seyyid Ali Çavuş zevcesi menzili tarafından mâ‘adâ üç tarafdan taş duvarı müştemil terbî‘an dokuz yüz yirmi zirâ‘ bir bâb muhterik mülk menzil arsasının on sehm i‘tibârıyla üç sehm-i şâyi‘i kız karındaşım müvekkilem mezbûre Hacce Hadice Hatun’un irsen ve yedi sehm-i şâyi‘i dahi bâ-hüccet-i şer‘iye irsen ve şirâen benim yedimizde mülk ve hakkımız olmağın ben arsa-i mahdûde-i mezkûre ile zikr olunan arsanın tarîk-i âm cânibinde el-Hâc Mustafa Vakfı’ndan terbî‘an otuz zirâ‘ bir bâb manav dükkânının havası dahi vakf-ı mezbûrun bâ-hüccet-i şer‘iye hâlâ kāimmakām mütevellîsi işbu hâzır bi’l-meclis Ahmed b. Mehmed nâm kimesnenin cânib-i vakıfdan bi’t-tevliye yedimize i‘tâ eylediği mümzâ ve mahtûm bir kıt‘a izin temessükü nâtık olduğu üzere ber-i‘tibâr-ı mezkûr yedimizde mülkümüz olmağla hava-yı mezkûru dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûr İbrahim Çavuş Ağa’ya dört yüz doksan guruşa bi’l-asâle ve bi’l-vekâle bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr dört yüz doksan guruşu mezbûr İbrahim Çavuş Ağa yedinden tamamen ahz ü kabz eyledim, ba‘de’l-yevm arsa-i mahdûde-i mezkûre zikr olunan havası ile mezbûr İbrahim Çavuş Ağa’[nın] mülk-i müşterâsı ve hakk-ı sarfı olup benim ve kız karındaşım müvekkilem mezbûrenin kat‘a alâka ve medhalimiz kalmamışdır dedikde mezbûr İbrahim Çavuş Ağa ile mütevellî-i mezbûr Mehmed dahi mukırr-ı mezbûr Süleyman Ağa’yı cemî‘ kelimât-ı meşrûhasında vicâhen ve şifâhen tahkīk ve tasdîk etmeğin mâ-vaka‘a bi’t-taleb. Fî 29 min-C sene 1197 Şühûdü’l-hâl: İmâm es-Seyyid Mehmed Emin Efendi, Müezzin Mustafa b. Mustafa, Ali Çavuş Ağa b. Mustafa, Osman Çavuş Ağa b. Mehmed, diğer Osman Çavuş Ağa b. Mustafa, Hüseyin Çavuş Ağa b. Mehmed, Molla Ali b. Halil ve gayruhum.