Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 253 Hüküm no: 207 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mardıros v. Minas’ın Kazzaz Partık aleyhindeki alacak davasında anlaşma sağlanması Ma‘rûz, Tüccâr tâifesinden arzuhâl eden Mardıros v. Minas nâm zimmî Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i hatîrde medîne-i Üsküdar’da Mar Yakub mahallesi mütemekkinlerinden derûn-ı arzuhâlde mastûrü’l-ism Kazzâz Partık v. Ohannes nâm zimmî muvâcehesinde mersûm Partık zimmînin yedinde mülkü olup mahalle-i merkūmede vâki‘ üç bâb odayı müştemil bir bâb menzilini bin iki yüz elli beş senesi hilâlinde mersûmun bi-şartı’r-rücû‘ emriyle müceddeden binâ ve inşâ etmemle menzil-i mezkûre malımdan masrûfum olup bi’l-mürâca‘a alacak hakkım olan beş bin guruşu mesfûr Partık zimmîden bi’l-mürâca‘a hâlâ taleb ederim deyü tasaddî eylediğim da‘vâmdan bâ-tavassut-ı muslihîn mesfûr Partık zimmî ile bi’t-tav‘ ve’r-rızâ üç yüz guruş bedel-i medfû‘ ve makbûza sulh olduğumda oldahi sulh-ı mezkûru ba‘de’l-kabûl ziyâde müdde‘âma ve bi’l-cümle husûs-ı mezkûre müte‘allika âmme-i [da‘vâ]dan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ikrâr ve tasdîkleri tescîl ve huzûr-ı âlîlerine i‘lâm olundu. Fî 29 Ra sene [12]57.