Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 488 Hüküm no: 557 Orijinal metin no: [80b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çavuş mahallesinde vefat eden Ayşe Hatun’un terekesinden vârislerin haklarını aldıkları Mîrâsdan ibrâ Mahmiye-i İslâmbol’da İbrahim Çavuş mahallesinde sâkine iken bundan akdem vefât eden Âişe Hatun bt. Ahmed’in verâseti zevc-i metrûkü Mustafa Beşe b. Hasan nâm kimesne ile babası Ahmed b. Ahmed nâm kimesneye ve vâlidesi Fatıma bt. Mehmed nâm hatuna münhasıra ve mesele-i mîrâsları altı sehm i‘tibârıyla üç sehmi zevci mezbûr Mustafa Beşe’ye ve iki sehmi babası mezbûr Ahmed’e ve bir sehmi vâlidesi mezbûre Fatıma Hatun’a isâbeti lede’ş-şer‘i’l-enver zâhir ve mütehakkık oldukdan sonra mezbûr Ahmed ve zâtı vech-i şer‘î üzere mu‘arrefe olan mezbûre Fatıma Hatun meclis-i şer‘-i şerîf-i enverde tereke-i müteveffât-ı mezbûra bi’l-verâse vâzı‘ü’l-yed olan işbu bâ‘isü’l-vesîka zevci mezbûr Mustafa Beşe mahzarında her biri bi’l-verâse ikrâr ve takrîr-i kelâm edip kızımız mûrisemiz müteveffât-ı mezbûrenin zevci mezbûr zimmetinde ma‘kūdun-aleyh olan elli guruş mehr-i müeccelim ile terekesi esmânından hâsıl ba‘de ihrâci’l-mesârifi’l-lâzıme sahhu’l-bâkī seksen guruş ki cem‘an yüz otuz guruşuna zevci mezbûr Mustafa Beşe bi’l-verâse vâzı‘ü’l-yed olmağla mezbûr Mustafa Beşe’nin ber-vech-i muharrer vâzı‘ü’l-yed olduğu meblağ-ı mecmû‘-ı mezkûr yüz otuz guruşu beynimizde alâ mâ-farazallâhu te‘âlâ tevzî‘ ve taksîm ve her birimiz i‘tibâr-ı mezkûr üzere hisse-i irsiye-i ma‘lûmemizi ahz ü kabz ve istifâ-yı hak edip kızımız mûrisemiz müteveffât-ı mezbûrenin kalîl ü kesîr celîl ü kasîr ism-i mâl ıtlâk olunur mecmû‘ terekesine ve mehr-i müeccel-i mezkûre ve hukūk-ı mîrâsa müte‘allika âmme-i de‘âvî ve kâffe-i mutâlebâtdan biz zevc-i mezbûr Mustafa Beşe’nin zimmetini ibrâ ve ıskāt eylediğimizde ibrâmızı kabûl eyledi dediklerinde gıbbe’t-tasdîki’ş-şer‘î. Fî 6 min-B sene 1197 Şühûdü’l-hâl: Hasan Efendi b. Mehmed imâm-ı mahalle-i mezbûre, Mehmed Efendi b. Mehmed, Halil Beşe b. Mahmud, es-Seyyid Mustafa Beşe b. Abdullah, Mustafa b. Ahmed, Molla Ali b. Halil, Ömer Çavuş Ağa b. Abdullah, Abdülgani Beşe b. Ahmed, Salih b. Halil.