Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 253 Hüküm no: 208 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Aci Mihal’in, Araboğlu Yorgi aleyhinde alacak iddiasında bulunmaktan men olunması Bakkāl Aci Mihal zimmînin sebep da‘vâsı men‘i Fi’l-asl Anadolu’da Nevşehir kazâsı kurâlarından Ürgüp karyesi re‘âyâsından olup medîne-i Üsküdar’da mütemekkin Bakkāl esnâfından derûn-ı arzuhâlde <> ismi mastûr Aci Mihal v. Mihal nâm zimmî Salı günü huzûr-ı hazret-i fetvâ-penâhîde ma‘kūd meclis-i şer‘-i hatîrde yine kazâ-i merkūm re‘âyâsından ve esnâf-ı merkūmeden arzuhâl eden Araboğlu Yorgi v. Sotri nâm zimmî muvâcehesinde hâlâ Bahr-ı siyah boğazı muhâfızı atûfetlü İbrahim Paşa hazretleri çend sene mukaddem kazâ-i mezbûrda voyvoda olmak takrîbiyle ahâlî-i kazâ-i mezbûr iki fırka olarak bir fırkası mûmâ-ileyh hazretlerinin kazâ-i mezbûrun voyvodalığından azlini ve fırka-i uhrâsı dahi yine ibkā olunmaklığını murâd eylemelerine ve mersûm Yorgi zimmî mûmâ-ileyh hazretlerinin azlini murâd eden fırkadan olduğuna mebnî gûyâ ben ve gāibân ani’l-meclis Tophâneli Samuyel ve İstefan zimmîlerden herbirimizi mûmâ-ileyh hazretlerinin ibkāsını murâd eden fırkadan olmak zu‘muyla benimle gāibân-ı mersûmânı bin iki yüz elli altı senesi şehr-i Ramazani’l-mübâreki hilâlinde Enderûn-ı hümâyûn’dan muhrec Baltacılar kethüdâsı sâbık İbrahim Efendi’ye gamz ederek benimle gāibân-ı mersûmân Samuyel ve İstefan zimmîden her birimizi vilâyetimiz olan kazâ-i mezkûr tarafına nefy ü ib‘âd etdirdip ol vechile benimle gāibân-ı mersûmândan her birimizin dokuzar bin guruşdan üçümüzün üzerine mübâşir ta‘yîn olunan Mehmed Gavvâs ve Süleyman Gavvâs nâm kimesnelere hizmet-i mübâşiriye olarak yirmi yedi bin guruş ve ıtlâk olunmaklığımız için dahi her birimizin üçer bin guruşdan ubûdiyet nâmıyla mezbûr İbrahim Efendi’ye dokuz bin guruş ki min-haysü’l-mecmû‘ mallarımızdan otuz altı bin guruş harc u sarf etmemizle mersûm Yorgi zimmî sebeb olmuş olmağla böyle olucak meblağ-ı mezkûr otuz altı bin guruşu benimle gāibân-ı mersûmân malından edâ ve teslîme mersûm Yorgi zimmîye tenbîh olunsun deyü takrîr-i meşrûhu üzere tasaddî eylediği sebeb da‘vâsı mesmû‘a ve iltifâta şâyân olmamağla müdde‘î-i mersûm Aci Mihal zimmî da‘vâ-yı mezkûresiyle mesfûr Yorgi zimmîye bî-vech mu‘ârazadan men‘ olunduğu huzûr-ı [âlîlerine i‘lâm olundu]. Fî 18 R sene 1257.