Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 488 Hüküm no: 558 Orijinal metin no: [80b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın Ayazmakapısı’nda bulunan işkembeci dükkânındaki âletlerin yarısının kendine ait olduğuna dair şahitler olduğu Nısf gedik istihbârı Mahmiye-i İslâmbol’da Unkapanı hâricinde sâkin işkenbeciler kethudâsı işbu bâ‘isü’l-kitâb Ahmed Ağa b. Hasan nâm kimesne meclis-i şer‘-i şerîf-i enverde takrîr-i kelâm ve bast-ı merâm edip mahmiye-i mezbûrede Ayazmakapısı dâhilinde kâin ma‘lûmü’l-hudûd bir bâb işkenbeci dükkânı derûnunda mevcûd beyne’l-hıref gedik ta‘bîr olunur iki kebîr kazgan ve iki tencere ve dört kefçe ve bir bıçak ve bir kanca ve iki fıçı ve bir re’s himâr ve sâir âlât-ı lâzıme-i ma‘lûmenin nısf-ı şâyi‘i işbu hâzır bi’l-meclis Koco v. Petro nâm zimmînin ve nısf-ı şâyi‘-i âharı dahi sekiz sehm i‘tibârıyla sümünü sulbiye kebîre kızım Zeliha Hatun’un ve seb‘a-i esmânı sagīr oğlu Abdullah b. İbrahim’in irsen yedlerinde mülkleri olduğu hâlde kızım mezbûre Zeliha Hatun mârrü’z-zikr gedik ta‘bîr olunan eşyâ-i muharrere ve sâir âlât-ı lâzıme-i ma‘lûmeden ber-i‘tibâr-ı mezkûr mâlike olduğu bir sehm ile oğlu sagīr-i mezbûrun tesviye-i emrini rü’yete kıbel-i şer‘den bâ-hüccet-i şer‘iye vasîyy-i mansûbesi olmağla sagīr-i mezbûrun gedik-i mezkûrda ber-i‘tibâr-ı mezkûr mâlik olduğu bir sehmini dahi semen-i misli ile âhara bey‘e kıbel-i şer‘den mezûn olduğuna binâen kızım mezbûre Zeliha Hatun ber-vech-i muharrer gedik-i mezkûrda olan nısf-ı şâyi‘i bin yüz doksan üç senesi Şa‘bâni’l-mu‘azzamının beşinci günü dört yüz guruş semen-i medfû‘ ve makbûza bi’l-asâle ve bi’l-vesâye bana bey‘ ve temlik ve vech-i lâyıkı üzere teslîm ve ben dahi ber-vech-i muharrer iştirâ ve temellük ve tesellüm ve kabûl edip ol-vechile gedik ta‘bîr olunan eşyâ-i muharrere-i mezkûra ve sâir âlât-ı lâzıme-i ma‘lûmenin nısf-ı şâyi‘i hâzır-ı merkūm Koco zimmînin ve nısf-ı şâyi‘-i âharı dahi benim bâ-hüccet-i şer‘iye şirâen yedimde mülk ve hakkım iken hüccetim sene-i sâbıkā Ramazani’l-mübârekinin evâsıtında vukū‘ bulan harîk-i kebîr-i gālibde muhterik olmağla takrîrim zabt ve tahrîr ve husûs-ı mezkûra vukūf-ı tammı olan bî-garaz Müslimînden suâl ve istihbâr ve haberleri hüccet olunmak matlûbumdur dedikde hakīkat-i hâl bi’l-cümle mukırr-ı mezbûr Ahmed Ağa’nın bâlâda bast ü beyân ve şerh ü ayân eylediği minvâl üzere olduğunu zeyl-i vesîkada muharrerü’l-esâmî Müslimînden her biri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb. Fî 6 B sene 1197 Şühûdü’l-hâl: Mumcu es-Seyyid Osman Ağa b. es-Seyyid Mehmed, Ali b. Hasan, Hasan b. Abdullah, Mehmed b. Ahmed, Ebûbekir Beşe b. Hüseyin, Yakub Beşe b. Mustafa, Molla Ali b. Halil, Molla Mehmed b. Mustafa, Kebâbcı Ömer Beşe ve gayruhum.