Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 489 Hüküm no: 559 Orijinal metin no: [80b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pîrî mahallesinden Naile bt. Abdullah ile Osman Ağa’nın boşanması Muhâla‘a, vekâleten Mahmiye-i İslâmbol’da el-Hâc Pîrî mahallesinde sâkine Nâile bt. Abdullah nâm hatun tarafından husûs-ı âti’l-beyânı ikrâra vekîl olduğu zât-ı mezbûreyi ârifân Ömer Ağa b. Ali ve Yakub Ağa b. Ebûbekir nâm kimesneler şehâdetleriyle şer‘an sâbit olan mahalle-i mezbûre imâmı İshak Efendi b. el-Hâc Mustafa meclis-i şer‘-i hatîr-i lâzımü’t-tevkīrde müvekkile-i mezbûrenin zevc-i muhâlı‘ı işbu bâ‘isü’l-kitâb es-Seyyid Osman Ağa b. es-Seyyid Osman mahzarında bi’l-vekâle ikrâr ve takrîr-i kelâm edip müvekkilem mezbûre Nâile Hatun’un zevci mezbûr es-Seyyid Osman Ağa ile beynlerinde hüsn-i mu‘âşeretleri olmayıp müvekkilem mezbûre hul‘a tâlibe olduğu ecilden zevci mezbûr es-Seyyid Osman Ağa zimmetinde mütekarrer ve ma‘kūdun-aleyh olan yüz guruş mehr-i müecceli ve nafaka-i iddet-i ma‘lûmesi üzerlerine ve meûnet-i süknâsı dahi müvekkilem mezbûrenin kendi üzerine olmak üzere mahalle-i mezbûrede sâkine olduğu menzilinde işbu târih-i kitâb günü zevci mezbûr es-Seyyid Osman Ağa ile muhâla‘a-i sahîha-i şer‘iye ile hul‘ olduğunda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve ibtidâ-i zevciyetden târih-i kitâba gelince beynlerinde cârî hukūk-ı sâireye müte‘allika âmme-i de‘âvî ve kâffe-i mutâlebâtdan müvekkilem mezbûre Nâile Hatun zevci mezbûr es-Seyyid Osman Ağa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğinde ol dahi kezâlik hukūk-ı zevciyete ve sâire müte‘allika âmme-i de‘âvîden zevcesi müvekkilem mezbûre Nâile Hatun’un zimmetini ibrâ ve ıskāt edip her biri ber-minvâl-i muharrer âharın ibrâsını kabûl eylediler dedikde mezbûr es-Seyyid Osman Ağa dahi mukırr-ı vekîl-i mezbûr İshak Efendi’yi cemî‘ kelimât-ı meşrûhasında vicâhen ve şifâhen tahkīk ve tasdîk etmeğin mâ-vaka‘a bi’t-taleb. Fî 9 min-B sene 1197 Şühûdü’l-hâl: Ömer Ağa b. Ali, Yakub Ağa b. Ebûbekir, Molla Ali b. Halil, Salih b. Halil, Molla Mustafa b. Mustafa, Hacı Hasan b. Osman, Molla Mehmed b. Mustafa ve gayruhum.