Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 254 Hüküm no: 209 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Papasoğlu Sahak’ın Eğin’in Kemergab köyündeki menzil ve bahçesini Kokas’a satması İhrâç şüd, fî 4 N sene [1]259. Vilâyet-i Anadolu’da Eğin kazâsına tâbi‘ Kemergab karyesinde mütemekkin Papasoğlu sarrâf tâifesinden Sahak v. Sahak nâm zimmî meclis-i şer‘-i hatîr-i lâzımü’t-tevkīrde sadrî kebîr oğlu işbu bâ‘isü’l-vesîka Kokas nâm zimmî muvâcehesinde ikrâr-ı tâm ve takrîr-i kelâm edip karye-i mezkûrda kâin bir tarafdan Yakub menzili ve bir tarafdan Kigork menzili ve bir tarafdan menzil-i mezkûrun bahçesi ve taraf-ı râbi‘i tarîk-i âm ile mahdûd bir bâb mülk menzil ve bir kıt‘a bahçesi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ile oğlum mersûm Kokas zimmîye iki bin beş yüz guruşa bey‘ ve temlîk ve mahâllinde kabza tarafımdan taslît ve ber-vech-i muharrer iştirâ ve temellük ve taslît ve kabûl eyledikden sonra semeni olan meblağ-ı mezkûr iki bin beş yüz guruşu bana def‘ ü teslîm eylediğinde ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik, ba‘de’l-yevm menzil ve bahçe-i mahdûd-ı mezkûrda benim aslâ ve kat‘â alâka ve medhalim kalmayıp mersûm Kokas zimmînin mülk-i müşterâsı ve hakk-ı sırfı olmuşdur dedikde [gıbbe’t-tasdîki’ş-şer‘î mâ-vaka‘a bi’t-taleb ketb olundu]. Fî 14 Ra sene [12]57. Şuhûdü’l-hâl: Ereğli karyesinde Canbâz Hacı Ali Ağa, yine karye-i merkūmede Canbâz Mehmed Ağa, Yeğeni Yakub v. Karabet, Dâmâdı Tatoş v. Abraham, Soraklı Sahak v. Yamandi.