Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 500 Hüküm no: 573 Orijinal metin no: [83a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sancakdar Hayreddin mahallesinde vefat eden Mustafa b. Mehmed’in vârislerinden kardeşi İbrahim Efendi’nin mirastan hakkını tamamen aldığı El-emrü hasbe mâ zükire fîhi Mehmed hallâlü’d-dîniyye el-müvellâ hilâfeten bi-mahkemeti Davudpaşa bi-Dâri’l-hilâfe nemakahû el-fakīru azze şânühû -gufira leh- Mahmiye-i İslâmbol’da Sancakdâr Hayreddin mahallesinde sâkin olup iki seneden beri maraz-ı müzmine mübtelâ olduğu hâlde bundan akdem vefât eden el-Hâc Mustafa b. Mehmed b. Süleyman nâm kimesnenin verâseti zevce-i metrûkesi Emine bt. Mustafa nâm hatun ile sulbiye sagīre kızı Rukiye’ye ve li-ebeveyn karındaşı İbrahim Efendi nâm kimesneye münhasıra ve mesele-i mîrâsları sekiz sehm i‘tibârıyla bir sehmi zevcesi mezbûre Emine Hatun’a ve dört sehmi sagīre-i mezbûre Rukiye’ye ve üç sehmi karındaşı mezbûr İbrahim Efendi’ye isâbeti tahakkukundan sonra mezbûr İbrahim Efendi meclis-i şer‘-i şerîf-i enverde sagīre-i mezbûrenin vâlidesi ve tesviye-i umûruna vasîsi olup tereke-i müteveffâ-yı mezbûra bi’l-asâle ve bi’l-vesâye vâzı‘atü’l-yed olan mu‘arrefetü’z-zât işbu sâhibetü’l-kitâb mezbûre Emine Hatun mahzarında ikrâr-ı tam ve takrîr-i kelâm edip karındaşım müteveffâ-yı mezbûr el-Hâc Mustafa’nın mecmû‘ı terekesiyle mahalle-i mezbûrede vâki‘ ma‘lûmü’l-hudûd ve’l-müştemilât nısf mülk menziline zevcesi mezbûre Emine Hatun ber-vech-i muharrer bi’l-asâle ve bi’l-vesâye vâzı‘atü’l-yed bulunmağla ba‘de ihrâci’d-düyûn ve’l-mesârifi’l-lâzıme ber-i‘tibâr-ı mezkûr bana isâbet eden hisse-i irsiyem mukābelesinde bir Mushaf-ı şerîf ve bir müsta‘mel nâfe biniş kürk ve bir çuka biniş ve bir döşek ve bir yasdık ve bir yorgan ve bir feneri tereke-i müteveffâ-yı mezbûrdan olmak üzere vasîyy-i mezbûre Emine Hatun yedinden ahz ü kabz ve istifâ edip kalîl ü kesîr ve celîl ü hakīr karındaşım müteveffâ-yı mezbûrun cemî‘ terekesine ve zikr olunan nısf mülk menzile ve bi’l-cümle hukūk-ı mîrâsa müte‘allika âmme-i de‘âvî ve kâffe-i mutâlebâtdan ben mezbûre Emine Hatun ile sagīre-i mezbûre Rukiye’den her birinin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eylediğimde mezbûre Emine Hatun dahi bana medfû‘u olan mârrü’z-zikr Mushaf-ı şerîf ile eşyâ-i muharrer-i mezkûreye ve bi’l-cümle hukūk-ı mîrâsa müte‘allika âmme-i da‘vâdan benim zimmetimi bi’l-asâle ibrâ-i âm ile ibrâ ve ıskāt eyledi dedikde mezbûre Emine Hatun dahi mukırr-ı merkūm İbrahim Efendi’yi cemî‘ kelimât-ı meşrûhasında vicâhen tasdîk ve şifâhen tahkīk etmeğin mâ-vaka‘a bi’t-taleb ketb olundu. Fi’l-yevmi’s-sâdis min-Zilka‘deti’ş-şerîfe li-sene semânîn ve mi’eti ve elf. Şühûdü’l-hâl: Ali Ağa b. Musa, es-Seyyid Ahmed Efendi b. Mehmed, Mustafa Çelebi b. Ahmed, es-Seyyid Mustafa Çelebi b. İbrahim, Hasan Ağa b. Hüseyin, Mehmed Çelebi b. Musa, Osman Bey b. Musa, Baba Ali b. Mehmed, Molla Ali b. Halil, Mehmed Beşe b. İbrahim ve gayruhum.