Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 504 Hüküm no: 581 Orijinal metin no: [84a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Mustafa’nın İsmail, Pavli ve Mano’nun parasını aldığına dair iddiasını ispatlayamadığı Mahmiye-i İslâmbol’da Koca Mustafa Paşa kurbünde Canbaziye mahallesinde sâkin el-Hâc Osman Efendi b. Ahmed tarafından vech-i âtî üzere sâbitü’l-vekâle vekîl olan Molla Mustafa b. Abdullah Davudpaşa Mahkemesi’nde meclis-i şer‘de İsmail b. Mustafa nâm kimesne ile aşçı tâifesinden Pavli v. Mitro ve Mano v. Nasto nâm zimmîler muvâcehelerinde müvekkilim mezbûr Osman Efendi târih-i i‘lâmdan kırk iki gün mukaddem yedinde mâlı ve mülkü olan nakid iki yüz elli guruş ile sâir eşyâ-i mütenevvi‘a-i ma‘lûmesini bir sepet sandıkla ihrâk havfından nâşi mahmiye-i mezbûrede Davudpaşa mahallesinde kâin menzili karşısında vâki‘ bostana vaz‘ edip zikr olunan sandık ve eşyâ bostan-ı mezkûrda ihrâk esnâsında nakd-i mezbûr iki yüz elli guruşu mezbûrdan hufyeten ahz etmeleriyle meblağ-ı mezbûr iki yüz elli guruşu merkūmûndan bi’l-vekâle taleb ederim deyü ba‘de’d-da‘vâ ve’l-inkâr müdde‘î-i vekîl-i mezbûr müdde‘âsını beyândan ızhâr-ı acz edip talebiyle merkūmûn ba‘de’t-tahlîfi’ş-şer‘î mûcebince müdde‘î-i vekîl-i mezbûr Molla Mustafa husûs-ı mezkûr içün mezbûrûn İsmail ile Pavli ve Mano zimmîlere bilâ-beyyine bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 23 Şevvâl sene 1196