Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 505 Hüküm no: 582 Orijinal metin no: [84a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Hasan’dan aldığı borca karşılık evini vefaen ferağ eden Zeliha parayı ödediğinden evinin geri verilmesi Mahmiye-i İslâmbol’da Davudpaşa mahallesinde sâkine ve zâtı mu‘arrefe Emine bt. Hasan nâm hatun Davudpaşa Mahkemesi’nde meclis-i şer‘-i hatîrde kezâlik zâtı mu‘arrefe Zeliha bt. ( ) nâm hatun mahzarında merhûm Hazînedârbaşı Vakfı’nın mütevelliyesi tarafından vekîli kâtib-i vakf eş-Şeyh es-Seyyid Nureddin Efendi hâzır olduğu hâlde mezbûre Zeliha Hatun bin yüz doksan iki senesi mâh-ı Cumâdelâhirin on dördüncü günü yedimden ve mâlımdan istidâne ve kabz eylediği iki yüz guruş deyni mukābelesinde vâlidesi olup bundan akdem fevt olan Fatıma bt. Mustafa nâm hatun târih-i mezbûreden hâl-i hayatında vakf-ı merkūm müsakkafâtından mahalle-i mezbûrede kâin mutasarrıfe olduğu ma‘lûmü’l-hudûd ve’l-müştemilât bir bâb vakıf menzilini vefâen bana ferâğ ve tefvîz ve ben dahi ber-vech-i muharrer tefevvüz ve kabûl etmiş idim. Hâlâ menzil-i mezkûru mezbûre Zeliha Hatun’a red birle meblağ-ı merkūm iki yüz guruşu mezbûre Zeliha Hatun’dan taleb ederim deyü ba‘de’d-da‘vâ ve’l-istintâk mezbûre Zeliha Hatun dahi cevâbında târih-i mezbûrda müdde‘iye-i mezbûre Emine Hatun’dan ancak yüz seksen guruş istidâne ve kabzını ve mukābelesinde vâlidesi müteveffât-ı mezbûre hâl-i hayatında menzil-i mezkûrunu vefâen ferâğını ikrâr lâkin ziyâde yirmi guruşu ba‘de’l-inkâr müdde‘iye-i mezbûre Emine Hatun ziyâde müdde‘âsını beyâna ba‘de’l-havâle mertebe-i ikrârı olan yüz seksen guruşu müdde‘iye-i mezbûre Emine Hatun’a edâ ve teslîme mezbûre Zeliha Hatun’a menzil-i mezkûru mezbûre Zeliha Hatun’a geri ferâğ ve tefvîze mezbûre Emine Hatun’dan her birine tenbîh olunduğu bi’l-iltimâs huzûr-ı âlîlerine i‘lâm olundu. Fî 15 min-Şa‘bâni’l-mu‘azzam sene 1196