Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 506 Hüküm no: 586 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ördek Kasap mahallesinde Arap Mesude’den boşanmış olan Arap Ali’nin mehri ödemesi İslâmbol’da Ördek Kasab mahallesinde sâkine ve zâtı mu‘arrefe Arab Mesude bt. Abdullah nâm hatun Davudpaşa Mahkemesi’nde meclis-i şer‘de zevc-i mutallıkı Arab Ali b. Abdullah nâm kimesne mahzarında mezbûr Ali zevc-i dâhilim olduğu hâlde târih-i i‘lâmdan dört ay mukaddem bâyinen beni tatlîk etmekle zimmetinde ma‘kūdun-aleyh olan elli beş guruş mehr-i müeccelimi zevc-i mutallıkım mezbûr Ali’den hâlâ taleb ederim deyü da‘vâ etdikde ol dahi cevâbında fi’l-vâki‘ müdde‘iye-i mezbûre Mesude otuz iki guruş mehir ile zevcesi ve târih-i mezbûrda tatlîkini ikrâr lâkin ziyâde yirmi üç guruşu ba‘de’l-inkâr müdde‘iye-i mezbûre ziyâde müdde‘âsını isbât edemeyip istihlâf eyledikde ol dahi yemînden nükûl etmeğin mûcebince mehr-i mezkûr elli beş guruşu müdde‘iye-i mezbûre Mesude Hatun’a edâ ve teslîme mezbûr Ali’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 11 Şevvâl sene 1196