Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 509 Hüküm no: 593 Orijinal metin no: [85a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Artin’in oğulları Sahak ve Agop’un Haçador v. Mardıros’a olan borçlarını ödemeleri İşbu bâ‘isü’l-i‘lâm Haçador v. Mardıros nâm zimmî Davudpaşa Mahkemesi’nde meclis-i şer‘de Sahak ve Agop veledey Artin nâm karındaşlar muvâcehelerinde mesfûrân Sahak ve Agop zimmîler bundan akdem hâlike olan zevcem Bedirdine bt. Dakes nâm Nasrâniyenin li-ebeveyn er karındaşı oğulları olup ol-vechile hâlike-i merkūmenin verâseti benimle min-ciheti’l-usûbe merkūmâna münhasıra olmak zu‘muyla zevcem hâlike-i mersûmenin terekesinden hisse-i irsiyelerini benden taleb ve da‘vâ ve bâ-vesâtet-i muslihîn merkūmândan her birine bi-tarîki’s-sulh on beş guruşdan cem‘an otuz guruş def‘ ve teslîm etmiş idim. Lâkin işbu hâzıra bi’l-meclis Kaya bt. el-merkūm Dakes Nasrâniye zevcem hâlike-i merkūmenin li-ebeveyn kız karındaşı olup hâlike-i merkūmenin verâseti benimle kız karındaşı mersûme Kaya Nasrânî’ye münhasıra ve merkūmân Sahak ve Agop zimmîler verâsetden mahrûm olmalarıyla ber-vech-i muharrer medfû‘um olan meblağ-ı mezkûr otuz guruşu merkūmândan istirdâd ederim deyü ba‘de’d-da‘vâ ve’l-istintâk merkūmân Sahak ve Agop zimmîler dahi ber-vech-i muharrer ikrâr ve i‘tirâf etmeleriyle alâ-mûcebi ikrârihümâ meblağ-ı merkūm otuz guruşu müdde‘î-i mesfûr Haçador zimmîye geri redd ü teslîme mesfûrân Sahak ve Agop zimmîlere tenbîh olunduğu bi’l-iltimâs huzûr-ı âlîlerine i‘lâm olundu. Fî 13 Zilka‘de sene 1196