Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 257 Hüküm no: 211 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İşkodralı Mustafa Paşa’nın kızı Emine Hanım ile eşi Mehmed Nebil Bey’in birbirlerinde olan eşyalarını teslim ederek zimmetlerini ibra etmeleri İşbu sebt-i hâmiş olunan hüccetde nâm-ı sâmîleri muharrer vüzerâ-yı i‘zâmdan inâyetlü atûfetlü İşkodralı Mustafa Paşa hazretlerinin sâbıkā dâmâd-ı muhteremleri olup kezâlik hüccet-i mezkûrda isimleri mezkûr hâcegân-ı dîvân-ı müşeyyedü’l-erkândan atûfetlü Mehmed Nebil Beyefendi b. Mehmed Şakir Efendi’nin enişteleri ve tarafından husûs-ı âti’l-beyânda vekîl-i müseccel-i şer‘îleri hâcegân-ı dîvân-ı mu‘allâ erkândan re’fetlü Hasan Nâmi Efendi b. Ahmed Rıza Efendi meclis-i şer‘-i şerîf-i lâzımü’t-teşrîfde müşârün-ileyh hazretlerinin kerîme-i muhteremeleri kezâlik derûn-ı hüccetde isimleri mezkûre umdetü’l-muhadderât iffetlü Emine Hanımefendi taraf-ı bâhirü’ş-şereflerinden husûs-ı câi’z-zikirde vekîl-i müsbet-i şer‘îleri sa‘âdetlü Ömer Sırrı Efendi b. Derviş Süleyman mahzarında bi’l-vekâle ikrâr-ı tâm ve takrîr-i kelâm edip derûn-ı hüccetde tafsîl ve beyân ve tasrîh ve nümâyân kılındığı üzere ibrâdan müstesnâ müvekkile-i mûmâ-ileyhânın malı olarak müvekkil-i mûmâ-ileyhin indinde aynen mevcûd olan bir seccâde ve bir boğçayı müvekkile-i mûmâ-ileyhâ için vekîl-i mûmâ-ileyhe aynen def‘ ü teslîm eyledikde ol dahi müvekkil-i mûmâ-ileyhin malı olarak müvekkil-i mûmâ-ileyhânın kıbelinde olup müvekkil-i mûmâ-ileyhânın müvekkil-i mûmâ-ileyhin izninsiz fuzûlen âhara bey‘le istihlâk eyledikleri bir mücevherli zarf kıymeti olan dört bin guruş ile atlas üzerine sırma işlemeli bir seccâde ve üçü mücevherli bir kaşığı müvekkilim mûmâ-ileyh için bana def‘ ü teslîm eylediğinde ben dahi bi’l-vekâle yedinden ahz u kabz edip min-ba‘d zevcân-ı müvekkilân-ı mûmâ-ileyhimâdan her birinin âharın yed ve zimmetinde bir akçe ve bir habbe ve bir nesne hakları ve alacakları kalmamışdır dediklerinde gıbbe’t-tasdîki’[ş-şer‘î mâ-vaka‘a bi’t-taleb ketb olundu]. Fî 10 R sene [12]57.