Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 258 Hüküm no: 212 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Demircioğlu İbrahim’in, Karabacakoğlu İbrahim aleyhindeki tarla ve menzil yeri davasında anlaşma sağlanması Ma‘rûz, Anadolu’da Kastamonu sancağında Bolu kazâsına tâbi‘ Tavşanlı Divânı’nda Kavak karyesi ahâlîsinden sâhib-i arzuhâl Demircioğlu İbrahim b. Hasan Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde karye-i mezbûre ahâlîsinden derûn-ı arzuhâlde mezkûrü’l-ism Karabacakoğlu es-Seyyid İbrahim b. Mehmed nâm kimesne muvâcehesinde karye-i mezbûre hudûdu dâhilinde Şatıroğlu Yurdu ittisâlinde bir bâb menzil yeri yedimde mülküm ve Kumlaryeri demekle arîf nâm mahâlde Şatıroğlu tarlası ve doruk ve tarîk-i âm ile mahdûd üç keyl tohum istî‘âb eder bir kıt‘a tarla taht-ı tasarrufumda iken mezbûr es-Seyyid İbrahim bir müddetden beri zikr olunan menzil yeri ile tarla-yı mezkûru fuzûlî zabt ve vaz‘-ı yed etmekle keff-i yed ve mahâllinde bana teslîme mezbûr es-Seyyid İbrahim’e tenbîh olunmak matlûbumdur deyü da‘vâya tasaddî etmiş idim. El-hâletü hâzihî mezbûr es-Seyyid İbrahim zikirleri mürûr eden menzil yeri ile tarla-yı mahdûd-ı mezkûrlardan bu def‘a keff-i yed ve mahâllinde bana teslîme ta‘ahhüd etmekle ben dahi ta‘ahhüdünü kabûl ve bu vechile kat‘-ı münâza‘a eyledik deyü mukırr-ı merkūm İbrahim’in bi’l-cümle takrîr-i meşrûhunu mezbûr İbrahim’in tasdîk eylediği tescîl ve huzûr-ı âlîlerine i‘lâm olundu. El-emru [li-men-lehü’l-emr]. Fî 13 R sene [12]57.