Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 512 Hüküm no: 599 Orijinal metin no: [85b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa mahallesinde vefat eden Hamza b. Mehmed’in vârislerinden İbrahim ve Şerife Fatma Hatun’un diğer mirasçıların mal sakladığı yolundaki iddialarını ispatlayamadığı Mahmiye-i İslâmbol’da Aksaray kurbünde İsmail Ağa mahallesinde sâkin iken bundan akdem fevt olan es-Seyyid Hamza b. Mehmed’in verâseti zevce-i menkûhaları Âişe bt. Abdullah ve Fatıma bt. Abdullah nâm hatunlar ile li-ebeveyn er karındaşı es-Seyyid İbrahim ve kız karındaşı Şerife Ümmühani evlâd-ı mezbûr Mehmed’e münhasıra ve mesele-i mîrâsları sekiz sehm i‘tibârıyla birer sehmden iki sehmi zevceleri mezbûretân Âişe ve Fatıma hatunlara dört sehmi er karındaşı mezbûr es-Seyyid İbrahim ve iki sehmi kız karındaşı mezbûre Şerife Ümmühani Hatun’a isâbeti tahakkukundan sonra zâtı mu‘arrefe mezbûre Fatıma Hatun asâleten ve kendi nefsinden asîl ve kız karındaşı mezbûre Şerife Ümmühani tarafından vech-i âtî üzere sâbitü’l-vekâle vekîli mezbûr es-Seyyid İbrahim Davudpaşa Mahkemesi’nde meclis-i şer‘-i hatîrde ve zâtı mu‘arrefe mezbûre Âişe Hatun mahzarında mûrisimiz müteveffâ-yı mezbûr es-Seyyid Hamza’nın hîn-i vefâtında terekesinden dört yüz guruş nakdini mezbûre Âişe ihfâ etmekle meblağ-ı merkūm dört yüz guruşdan ber-i‘tibâr merkūm bize isâbet eden üç yüz elli guruşu asâleten ve vekâleten mezbûre Âişe Hatun’dan taleb ederiz deyü ba‘de’d-da‘vâ ve’l-istintâk ve’l-inkâr müdde‘iyân-ı mezbûrân es-Seyyid İbrahim ve Şerife Fatıma Hatun ber-vech-i muharrer müdde‘âlarını beyândan ızhâr-ı acz edip talebleriyle mezbûre Âişe Hatun ba‘de’t-tahlîfi’ş-şer‘î mûcebiyle müdde‘iyân-ı mezbûrân es-Seyyid İbrahim ve Şerife Fatıma husûs-ı mezkûr içün mezbûre Âişe Hatun’a bilâ-beyyine bî-vech mu‘ârazadan men‘ olundukları bi’l-iltimâs huzûr-ı âlîlerine i‘lâm. Fî 21 min-Za sene 1196