Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 519 Hüküm no: 616 Orijinal metin no: [86b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir’in vârislerinden Mehmed’in Ali b. Hüseyin’deki alacağını ispatlayamadığı Vilâyet-i Anadolu’da Eğin kazâsına tâbi‘ Şirzo nâm karye ahâlisinden olup bundan akdem vilâyet-i mezbûrede Van kazâsında fevt olan es-Seyyid Ebûbekir’in verâseti zevce-i metrûkesi Nesime bt. Ebîbekir nâm hatun ile sulbî kebîr oğlu es-Seyyid Mehmed’e ve sulbiye kebîre kızı Şerife Hanife’ye münhasıra ve mesele-i mîrâsları yirmi dört sehm i‘tibârıyla üç sehmi zevcesi mezbûre Nesime Hatun’a ve on dört sehmi oğlu mezbûr es-Seyyid Mehmed’e ve yedi sehmi mezbûre Şerife Hanife’ye isâbeti tahakkukundan sonra mezbûr es-Seyyid Mehmed Davudpaşa Mahkemesi’nde meclis-i şer‘de Ali b. Hüseyin mahzarında babam müteveffâ-yı mezbûr hâl-i hayatında mezbûr Ali’ye cihet-i karzdan Tiryâki Hüseyin yediyle elli sekiz guruş def‘ ve teslîm ol dahi ba‘de’l-ahz ve’l-kabz meblağ-ı mezbûr elli sekiz guruşu babam mezbûr kable’l-ahz ve’l-istifâ fevt ve meblağ-ı mezbûr ber-i‘tibâr-ı merkūm benimle vâlidem mezbûre ile kız karındaşım mezbûreye mevrûs olmağla ben meblağ-ı mezbûrdan on dört sehme isâbet eden otuz üç guruş yüz akçe hisse-i irsiyemi mezbûr Ali’den hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr es-Seyyid Mehmed ber-vech-i muharrer müdde‘âsını beyândan âciz ve talebiyle mezbûr Ali ba‘de’t-tahlîfi’ş-şer‘î mûcebiyle müdde‘î-i mezbûr es-Seyyid Mehmed meblağ-ı mezbûr otuz guruş yüz akçe mutâlebesiyle mezbûr Ali’ye bilâ-beyyine bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 15 Z sene 1196