Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 521 Hüküm no: 619 Orijinal metin no: [86b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan taifesinden olup ortaklıklarını fesheden Nikola v. Voli ile Yanaki v. Mano arasındaki alacak davası Bahçevân tâifesinden Nikola v. Voli nâm zimmî Davudpaşa Mahkemesi’nde meclis-i şer‘de yine tâife-i mezbûreden Yanaki v. Mano zimmî muvâcehesinde bundan akdem merkūm Yanaki zimmî ile bağçevânlık san‘atında dört buçuk ay mikdârı şerîkler olup târih-i i‘lâmdan dokuz ay mukaddem şirketi fesh birle hesâb ve kitâbımızı rü’yet edip benim merkūm Yanaki zimmetinde kırk guruş hakkım zuhûr etmekle meblağ-ı mezbûr kırk guruşu merkūm Yanaki zimmîden taleb ederim deyü da‘vâ etdikde ol dahi cevâbında meblağ-ı mezbûr kırk guruşu inkârından mâ‘adâ benim merkūm Nikola zimmîde cihet-i mezkûreden dört guruş yirmi yedi para alacak hakkım zuhûr edip ben meblağ-ı merkūm dört guruş yirmi yedi paraya ve merkūm Nikola dahi da‘vâ sadedinde olduğu meblağ-ı merkūm kırk guruşa müte‘allika da‘vâdan meccânen fâriğ olup husûs-ı mezkûra müte‘allika da‘vâdan birbirimiz âharın zimmetini ibrâ ve ıskāt ve her birimiz âharın ibrâsını kabûl etmiş idik deyü ba‘de’d-def‘ ve’l-ikrâr mûcebiyle müdde‘î-i merkūm Nikola zimmî da‘vâ-yı mezkûresiyle merkūm Yanaki zimmî bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu, bâkī emr. Fî 21 min-Z sene 1196