Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 527 Hüküm no: 633 Orijinal metin no: [88a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacce Emine Hatun’un evinde kiracı olarak oturan Bostanî Mustafa’nın evi tahliye edeceği Mahmiye-i İslâmbol’da Hacce Hatun mahallesinde sâkine mu‘arrefetü’z-zât Hacce Emine Hatun bt. Ahmed Davudpaşa Mahkemesi’nde meclis-i şer‘de zikri âtî bir bâb menzilde müşâhereten müsteciri Bostânî Mustafa b. Musa nâm kimesne mahzarında mezbûr Bostânî Mustafa mahalle-i mezbûrede vâki‘ ma‘lûmü’l-hudûd ve’l-müştemilât taht-ı tasarrufumda bir bâb vakıf menzilimde beher şehr ikişer guruş ücret tesmiyesiyle müstecirim olup bin yüz doksan altı senesi şehr-i Rebî‘ülevveli gurresinden sene-i mezbûre Zilhiccesi gāyetine gelince menzil-i mezkûr ücretinden mezbûr Bostânî Mustafa zimmetinde terâküm eden guruşun otuz parasını ahz ve on dokuz guruş on parası zimmetinde bâkī kalmağla bâkī-i merkūm on dokuz guruş on parayı mezbûr Bostânî Mustafa’dan taleb ederim deyü ba‘de’d-da‘vâ ve’l-istintâk mezbûr Bostânî Mustafa cevâbında müdde‘iye-i mezbûre Emine Hatun’un menzil-i mezkûrunda beher şehr içün otuzar para ücret ile müsteciri olduğunu ve müddet-i mezkûrede müdde‘iye-i mezbûre kabzını mu‘terife olduğu otuz paradan mâ‘adâ zimmetinde altı guruş otuz para bâkī kaldığını ikrâr mâ‘adâ ellişer para ücret kavlini inkâr etmekle müdde‘iye-i mezbûre Emine Hatun mâ‘adâ müdde‘âsını beyâna ba‘de’l-havâle mertebe-i ikrârı olan meblağ-ı bâkī-i merkūm altı guruş otuz paranın edâsıyla mezbûr Bostânî Mustafa ilzâm olundukdan sonra müdde‘iye-i mezbûre Emine Hatun işbu târih-i i‘lâm şehri gāyetinde fesh-i akd-i icâre birle [menzil-i] mezkûrun kendüye teslîmini mutâlebe etmeğin mezbûr Mustafa dahi târih-i i‘lâmdan bi’r-rızâ on güne değin hurûca ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 9 M sene 1197