Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 528 Hüküm no: 634 Orijinal metin no: [88a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ligori v. Yorgaki’nin alacağına kefil olan Petro’nun borcu ödemesi Mahmiye-i İslâmbol’da Edirnekapısı kurbünde mütemekkin Ligori v. Yorgaki nâm zimmî Davudpaşa Mahkemesi’nde meclis-i şer‘-i hatîrde Petro v. Nikola nâm zimmî muvâcehesinde merkūm Petro zimmînin babası işbu hâzır bi’l-meclis merkūm Nikola zimmî bundan akdem yedimden ve mâlımdan iştirâ ve kabz eylediği aded ve fiyâtı beynimizde ma‘lûm kurşun kumkuma semeninden cem‘an merkūm Nikola zimmî zimmetinde iki yüz kırk guruş alacak hakkım olup ve meblağ-ı merkūm iki yüz kırk guruş ber-vech-i muharrer bana deyni olduğunu müş‘ir yedime karz ünvânıyla bir kıt‘a temessük dahi i‘tâ ve meblağ-ı merkūm iki yüz kırk guruşun edâsına oğlum merkūm Petro zimmî dahi kefîl bi’l-mâl oldukdan sonra meblağ-ı merkūm iki yüz kırk guruşun on bir guruşunu merkūm Nikola zimmî yedinden ahz ve iki yüz yirmi dokuz guruşu zimmetinde bâkī kalmağla meblağ-ı bâkī-i merkūm iki yüz yirmi dokuz guruşu dahi merkūm Petro zimmîden kefâletine binâen taleb ederim deyü ba‘de’d-da‘vâ ve’l-istintâk merkūm Petro zimmî dahi vech-i muharrer üzere ikrâr etmeğin mûcebiyle meblağ-ı bâkī-i merkūm iki yüz yirmi dokuz guruşu bi-hükmi’l-kefâle edâsıyla merkūm Petro zimmî dahi ilzâm olunduğu bi’l-iltimâs huzûr-ı âlîlerine. Fî 9 M sene 1197