Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 529 Hüküm no: 635 Orijinal metin no: [88a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mimaracem mahallesinden Fatma bt. İbrahim’den boşanan Mustafa Efendi’nin mehir ve nafakayı ödemesi İslâmbol’da Mi‘mâr Acem mahallesinde sâkine ve zâtı mu‘arrefe Fatıma bt. İbrahim nâm hatun Davudpaşa Mahkemesi’nde meclis-i şer‘de zevc-i mutallıkı eş-Şeyh Mustafa Efendi b. Süleyman mahzarında mezbûr eş-Şeyh Mustafa Efendi on guruş mehr-i müeccel tesmiyesiyle zevc-i dâhilim olduğu hâlde târih-i i‘lâmdan üç gün mukaddem beni tatlîk etmekle zimmetinde ma‘kūdun-aleyh ola[n] mehr-i mezkûr on guruş hakkım ile nafaka-i iddet-i ma‘lûme ve meûnet-i süknâm dahi zevc-i mutallıkım mezbûrdan hâlâ taleb ederim deyü ba‘de’d-da‘vâ ve’l-istintâk ve’l-ikrâr alâ-mûcebi ikrârihî meblağ-ı mehr-i mezkûr on guruşun edâsıyla mezbûr eş-Şeyh Mustafa Efendi ba‘de’l-ilzâm müdde‘iye-i mezbûre Fatıma Hatun’u ber-vech-i muharrer nafaka-i iddet-i ma‘lûme ve meûnet-i süknâsı içün zevc-i mutallıkı mezbûr eş-Şeyh Mustafa Efendi ile üç guruş üzerine terâzî eyledikleri bi’l-iltimâs huzûr. Fî 11 min-Muharremi’l-harâm sene 1197