Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 530 Hüküm no: 638 Orijinal metin no: [88b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Ömer’in Zile’de bulunan Yalnız Ağaç Malikânesi Vakfı’ndaki malikane hissesini Mehmed b. Mehmed’e ferağı Vilâyet-i Anadolu’da Sivas sancağında Zile nâhiyesinde Dursunbey temlikinde Yalnız Ağaç hudûdu dâhilinde ...? ve tevâbi‘i mâlikânesiyle Yalnız Ağaç Mâlikânesi Vakfı’nın ber-vech-i meşrûta mâlikâne hissedârlığına bâ-berât-ı şerîf-i âlî-şân mutasarrıf olduğu lede’l-ihbâr zâhir olan es-Seyyid Mustafa b. es-Seyyid Ömer tarafından vech-i âtî üzere vekîl olduğu Mustafa b. Mehmed ve es-Seyyid Ahmed b. Mehmed nâm kimesneler şehâdetleriyle sâbit olan el-Hâc Ahmed b. Ali Davudpaşa Mahkemesi’nde meclis-i şer‘de yine evlâd-ı vâkıfdan es-Seyyid Mehmed b. es-Seyyid Mehmed mahzarında müvekkilim mezbûr es-Seyyid Mustafa vakf-ı mezkûrdan ber-vech-i muharrer mutasarrıf olduğu hisse-i mezkûresini hüsn-i rızâ ve ihtiyârıyla mezbûr es-Seyyid Mehmed’e meccânen ferâğ ve kasr-ı yed edip yedinde olan atik berâtını mezbûr es-Seyyid Mehmed’e teslîm eyledi deyü mezbûr el-Hâc Ahmed’in bi’l-vekâle takrîrini mezbûr es-Seyyid Mehmed tasdîk ve yedine müceddeden berât-ı şerîf-i âlî-şân i‘tâ olunmak istid‘â eylediği bi’l-iltimâs huzûr-ı âlîlerine i‘lâm olundu. Bâkī emr ü fermân hazret-i men lehü’l-emrindir. Fi’l-yevmi’l-âşir min-Muharremi’l-harâm li-sene seb‘a ve tis‘în ve mi’e ve elf.