Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 530 Hüküm no: 639 Orijinal metin no: [88b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Musa’nın Kömürcü Mehmed’den aldığı kömürlerin ücretini tamamen ödediği Kömürcü tâifesinden Mehmed b. Mustafa nâm kimesne Davudpaşa Mahkemesi’nde meclis-i şer‘de yine tâife-i mezbûreden Yusuf b. Musa nâm kimesne mahzarında bundan akdem mezbûr Yusuf yedimden iştirâ ve kabz eylediği vezn ve fiyâtı beynimizde ma‘lûm kömür semeninden zimmetinde olan cem‘an yüz seksen guruş alacak hakkımın yüz altmış altı guruşunu yedinden ahz ü kabz ve on dokuz guruş zimmetinde bâkī kalmağla hâlâ taleb ederim deyü ba‘de’d-da‘vâ ve’l-istintâk ol dahi cevâbında ber-vech-i muharrer ikrâr lâkin meblağ-ı bâkī-i mezbûr on dokuz guruşu dahi kendüye tamamen edâ ve teslîm etmiş idim deyü ba‘de’d-def‘ ve’l-inkâr mezbûr Yusuf def‘-i mezkûrunu isbât edemeyip istihlâf eyledikde ol dahi yemînden nükûl etmeğin mûcebiyle müdde‘î-i mezbûr Mehmed meblağ-ı bâkī-i mezbûr on dokuz guruş mutâlebesiyle mezbûr Yusuf’a bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 16 min-Muharremi’l-harâm sene 1197