Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 532 Hüküm no: 642 Orijinal metin no: [88b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın tasarruf ettiği tımar hissesini Ömer Ağa’ya ferağ ettiği Vilâyet-i Rumeli’de Gelibolu ve Paşa ve Çirmen sancaklarında Emiri? ve gayrı nâhiyelerde Bolu nâm ve gayrıdan üç bin iki yüz yetmiş dört akçe tımar hissesine bâ-berât-ı şerîf-i âlî-şân mutasarrıf olduğu eş-Şeyh Abdulkadir Efendi b. eş-Şeyh Ahmed ve Ahmed Efendi b. İsmail ve es-Seyyid Halil Efendi b. el-Hâc Ahmed ve Ahmed Ağa b. Süleyman ve Mehmed Ağa b. Hasan ve Ali Ağa b. Mustafa nâm kimesneler ihbârlarıyla zâhir olan mahmiye-i İslâmbol’da Koca Mustafa Paşa kurbünde Bâzergân mahallesinde sâkin Ali Ağa b. Ahmed nâm kimesne Davudpaşa Mahkemesi’nde meclis-i şer‘-i hatîrde Ömer Ağa b. Mehmed nâm kimesne mahzarında ber-vech-i muharrer mutasarrıf olduğum tımar-ı mezkûr hissemi bundan akdem kendi hüsn-i rızâ ve ihtiyârımla mezbûr Ömer Ağa’ya ferâğ ve kasr-ı yed edip yedimde olan atik berâtı mezbûr Ömer Ağa’ya teslîm ol dahi ber-minvâl-i muharrer tesellüm ve kabûl eyledi deyü eylediği takrîrini mezbûr Ömer Ağa dahi tasdîk ve yedine müceddeden berât-ı şerîf-i âlî-şân i‘tâ ve ihsân olunmak istid‘âsında olduğu bi’l-iltimâs huzûr-ı âlîlerine i‘lâm olundu. Bâkī emr hazret-i men-lehü’l-emrindir. Fi’l-yevmi’t-tâsi‘ aşer min-Muharremi’l-harâm li-sene seb‘a ve tis‘în ve mi’e ve elf.