Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 535 Hüküm no: 649 Orijinal metin no: [89a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskenderağa mahallesinden Emine bt. Hüseyin’in kocası Hüseyin Beşe b. Mehmed’in kendisini üç talâk ile boşadığını ispatlayamadığı İslâmbol’da Şehremîni kurbünde İskender Ağa mahallesinde sâkine ve zâtı mu‘arrefe Emine bt. Hüseyin nâm hatun Davudpaşa Mahkemesi’nde meclis-i şer‘de zevc-i dâhili Hüseyin Beşe b. Mehmed mahzarında ben mezbûr Hüseyin Beşe’nin üç bin akçe mehr-i müecceli tesmiyesiyle zevce-i medhûlün-bihâsı olduğum hâlde târih-i i‘lâmdan bir sene mukaddem beni talâk-ı selâse ile tatlîk etmekle zimmetinde ma‘kūdun-aleyh olan mehr-i mezkûr üç bin akçe hakkımı zevcim mezbûrdan hâlâ taleb ederim deyü da‘vâ etdikde ol dahi cevâbında müdde‘iye-i mezbûre Emine Hatun mehr-i mezkûr ile zevcesi olduğunu ikrâr lâkin tatlîkini inkâr etmeğin müdde‘iye-i mezbûre Emine Hatun ber-vech-i muharrer tatlîk müdde‘âsını beyândan ızhâr-ı acz edip talebiyle mezbûr Hüseyin Beşe ba‘de’t-tahlîfi’ş-şer‘î mûcebince zevci mezbûr Hüseyin Beşe ile ezvâc mu‘âmelesi etmek üzere müdde‘iye-i mezbûre Emine Hatun’a tenbîh olunduğu bi’l-iltimâs huzûr-ı âlîlerine i‘lâm olundu. Fî 5 S sene 1197