Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 535 Hüküm no: 650 Orijinal metin no: [89a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzun Yusuf mahallesinden karısı Hadice’nin din ve imanına küfretmesi sebebiyle kocası İbrahim’den boşanmış olduğundan mehrini ödemesi ve iman tazelemesi gerektiği İslâmbol’da Uzun Yusuf mahallesinde sâkine ve zâtı mu‘arrefe Hadice bt. İbrahim nâm hatun Davudpaşa Mahkemesi’nde meclis-i şer‘de zevc-i mutallıkı İbrahim b. Hüseyin nâm kimesne mahzarında mezbûr İbrahim zevc-i dâhilim olduğu hâlde târih-i i‘lâmdan bir gün mukaddem mahalle-i mezbûrede sâkin olduğumuz menzilde benim dîn ve îmânıma sebb edip ondan nâşi ben mezbûrdan mübâne olmamla zimmetinde ma‘kūdun-aleyh olan dört guruş mehr-i müeccelim ile nafaka-i iddet-i mu‘ayyene ve meûnet-i süknâmı zevc-i mutallıkım mezbûrdan hâlâ taleb ederim deyü ba‘de’d-da‘vâ ve’l-istintâk mezbûr İbrahim dahi cevâbında müdde‘iye-i mezbûre mehr-i mezkûr ile zevcesi olduğunu ikrâr mâ‘adâyı ba‘de’l-inkâr müdde‘iye-i mezbûre Hadice ber-vech-i muharrer müdde‘âsını beyândan âcize ve talebiyle mezbûr İbrahim’e yemîn teklif olundukda ol dahi yemînden nükûl etmeğin mûcebince müdde‘iye-i mezbûre zevci mezbûrdan mübâne ve mezbûr İbrahim’e tecdîd-i îmân lâzım gelmeğin mezbûr İbrahim’e telkīn-i îmân olundukdan sonra mehr-i mezkûr dört guruşu müdde‘iye-i mezbûre Hadice’ye edâ ve teslîme mezbûr İbrahim’e ba‘de’t-tenbîh müdde‘iye-i mezbûre Hadice Hatun’u ber-vech-i muharrer nafaka-i iddet ve meûnet-i süknâsı içün zevc-i mutallıkı mezbûr İbrahim ile üç guruş üzerine terâzî eyledikleri bi’l-iltimâs huzûr-ı âlîlerine i‘lâm olundu. Fî 3 S sene 1197