Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 536 Hüküm no: 651 Orijinal metin no: [89b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimpaşa mahallesinden Mehmed b. Mehmed’in karısı Habibe’yi dövüp küfrettiğinden tazir cezası gerektiği İslâmbol’da Silivrikapısı dâhilinde İbrahim Paşa mahallesinde sâkine ve zâtı mu‘arrefe Habibe bt. el-Hâc Ömer nâm hatun Davudpaşa Mahkemesi’nde meclis-i şer‘de hâlâ zevci Mehmed b. Mehmed mahzarında târih-i i‘lâmdan otuz gün mukaddem zevcim mezbûr Mehmed ile mahalle-i mezbûrede vâki‘ mâ‘an sâkinler olduğumuz menzilinde zevcim mezbûr Mehmed sille ve yumruk ile benim başıma ve yüzüme darb eylediğinden mâ‘adâ ta‘zîri mûcib şütûm-ı galîza ile şetm etmekle mûcib-i şer‘îsini mezbûr Mehmed’den hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘iye-i mezbûre Habibe Hatun ber-vech-i muharrer müdde‘âsını şühûd-ı udûlden es-Seyyid Mehmed Efendi b. el-Hâc Hasan ve Mustafa b. Hüseyin nâm kimesneler şehâdetleriyle bi’l-muvâcehe vech-i şer‘î üzere isbât etmeğin mûcebince mezbûr Mehmed’e şer‘an ta‘zîr lâzım geldiği bi’l-iltimâs huzûr-ı âlîlerine i‘lâm olundu. Fî 7 S sene 1197