Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 536 Hüküm no: 652 Orijinal metin no: [89b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın evini yaptırdığı Dülger Ohan ölmüş olduğundan dülgerlik ücretinin mirasçılarına ödemesi İslâmbol’da Koca Mustafa Paşa mahallesinde mütemekkin iken bundan akdem hâlik olan Dülger Ohan v. Kiragos nâm zimmînin verâseti zevce-i metrûkesi Meyrem bt. Kirkor nâm Nasrâniye ile sulbî kebîr oğlu Andon ve sulbî sagīr oğulları Kirkor ve Begos’a ve sulbiye sagīre kızı Ananiye’ye inhisârı tahakkukundan sonra merkūm Andon zimmî asâleten ve şahsı mu‘arrefe olan mersûme Meyrem Nasrâniye kendi nefsinden asîl ve sagīrûn-ı mezbûrûnun anaları ve tesviye-i emirlerini rü’yete mansûbe vasîleri olmağla vesâyeten Davudpaşa Mahkemesi’nde meclis-i şer‘de es-Seyyid Ahmed Ağa b. es-Seyyid Mehmed nâm kimesne mahzarında bin yüz doksan altı senesi Şevvâli’l-mükerreminde mezbûr es-Seyyid Ahmed Ağa’nın taht-ı tasarrufunda mahmiye-i mezbûrede Davudpaşa mahallesinde vâki‘ ma‘lûmü’l-hudûd bir bâb muhterik vakıf arsasına mûrisimiz hâlik-i mesfûr Ohan zimmî mezbûr es-Seyyid Ahmed Ağa’nın emriyle müceddeden ihdâs eylediği binânın dülger ücreti ve yine mezbûr es-Seyyid Ahmed Ağa’nın bi-şarti’r-rücû‘ emriyle iştirâ eylediği ecnâs-ı kereste ve mismâr ve doğrama semenlerinden ba‘de külli’l-hesâb yüz üç guruş alacak hakkını kable’l-ahz ve’l-istifâ mezbûr Ohan zimmî hâlik ve meblağ-ı mezbûr yüz üç guruş bizimle sagīrûn-ı merkūmûna mevrûs olmağla biz meblağ-ı mezbûr yüz üç guruşu mezbûr es-Seyyid Ahmed Ağa’dan bi’l-asâle ve bi’l-vesâye hâlâ taleb ederiz deyü ba‘de’d-da‘vâ ve’l-istintâk ve’l-ikrâr alâ-mûcebi ikrârihî meblağ-ı mezbûr yüz üç guruşu müdde‘iyân-ı merkūmân Andon zimmî ve Meyrem Nasrâniyeye edâ ve teslîme mezbûr es-Seyyid Ahmed Ağa’ya tenbîh olunduğu bi’l-iltimâs huzûr-ı âlîlerine i‘lâm olundu. Fî 8 S sene 1197