Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 537 Hüküm no: 653 Orijinal metin no: [89b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil b. Abdulkadir’in Langa-i sagir’de kendi hissesini kiraya verdiği bostan ile alakalı olarak Hıristo ve Resto aleyhine açtığı davanın meşru olmadığı İşbu bâ‘isü’l-i‘lâm Halil b. el-Hâc Abdulkadir nâm kimesne Davudpaşa Mahkemesi’nde meclis-i şer‘de bağçevân Hıristo v. Tolgad ve Resto v. Tarabko nâm zimmîler muvâcehelerinde mahmiye-i İslâmbol’da Bostânî Abdullah Ağa mahallesinde Langa-i sagīr derûnunda vâki‘ birbirine muttasıl iki bâb vakıf bostanın iki yüz altmış sekiz sehm i‘tibârıyla otuz sehmi el-Hâc İsmail’in ve yüz otuz dört sehmi Feyzullah’ın ve yüz dört sehmi taht-ı tasarrufumuzda olduğu hâlde ben zikr olunan bostanlarda ber-vech-i muharrer mutasarrıf olduğum yüz dört sehm hisse-i şâyi‘amı gāibân ani’l-meclis Mehmed Emin nâm kimesne ile Mihal nâm zimmîye bin yüz doksan altı senesi rûz-ı hızırı ibtidâsından dört ay tamamına değin otuz dört guruş yirmi dokuz para bir akçe ücret tesmiyesiyle ale’l-iştirâk îcâr ve teslîm eylediğimde onlar dahi istîcâr ve tesellüm ve kabûl etmişler idi. Lâkin zikr olunan bostanlarda mesfûrân Hıristo ve Resto zimmîler mütemekkinler olmalarıyla mücerred ben meblağ-ı mezbûru mesfûrân Hıristo ve Resto zimmîlerden hâlâ taleb ederim deyü tesaddî eylediği da‘vâsı takrîr-i meşrûhu üzere meşrû‘a olmayıp mesfûrân Hıristo ve Resto zimmîlere şer‘an suâl dahi teveccüh etmediği bi’l-iltimâs huzûr-ı âlîlerine i‘lâm olundu. Fî 8 S sene 1197