Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 541 Hüküm no: 661 Orijinal metin no: [90a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Duvarcı Esteryo’nun Ahmed Ağa’dan alacağı olduğunu ispatlayamadığı < Duvarcı tâifesinden Esteryo v. Şomo nâm zimmî Davudpaşa Mahkemesi’nde meclis-i şer‘de Dergâh-ı âlî yeniçerileri çorbacılarından ikinci bölük çorbacısı es-Seyyid Ahmed Ağa b. es-Seyyid Abdurrahman Ağa mahzarında mezbûr es-Seyyid Ahmed Ağa’nın mahmiye-i İslâmbol’da Sancakdâr Hayreddin mahallesinde kâin bir bâb muhterik menzil arsasının etrâf duvarlarını mezbûr es-Seyyid Ahmed Ağa’nın bi-şarti’r-rücû‘ emriyle yine tâife-i mezbûreden ma‘lûmü’l-esâmî zimmîlere beher yevm birer guruş ücret ile yaptırdıp ecr-i müsemmâ-yı mezkûreden terâküm eden doksan guruşu ben zimmîyûn-ı merkūmûna tamamen edâ ve teslîm etmemle meblağ-ı mezbûr doksan guruşu mezbûr es-Seyyid Ahmed Ağa’nın emr-i mezkûruna binâen hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm Esteryo zimmî ber-vech-i muharrer müdde‘âsını bir vechile isbât edemeyip tahlîfe dahi tâlib olmamağın mûcebince müdde‘î-i merkūm Esteryo zimmî meblağ-ı mezbûr doksan guruş mutâlebesiyle mezbûr es-Seyyid Ahmed Ağa’ya bilâ-beyyine bî-vech mu‘ârazadan men‘ olunduğu mübâşirleri yazıcı miyânından Mustafa kulları iltimâsıyla huzûr-ı âlîlerine i‘lâm olundu. Fî 17 S sene 1197>>