Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 263 Hüküm no: 219 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan Yorgi ve Babası Hıristo’nun alacak davasından vazgeçtikleri Ma‘rûz, Ashâb-ı arzuhâlden Bahçıvan Yorgi zimmî babası Hıristo v. Kosti zimmî hâzır olduğu hâlde evvelâ Salı günü huzûr-ı hazret-i fetvâ-penâhîde ve ba‘dehu bi’t-terâzî dâr-ı müşârün-ileyhde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i hatîrde li-ebeveyn hâletesi oğulları derûn-ı arzuhâlde isimleri mastûr Yasef ve İstefo ve Pavli ve evlâdi’l-hâzır Dimitri v. Yani zimmîler muvâcehelerinde mersûmûndan mesfûr Yasef zimmîye bundan akdem malımdan ikrâz ve teslîm eylediğim iki bin beş yüz guruş mersûm İstefo zimmîye kezâlik ikrâz ve teslîm eylediğim iki bin dört yüz guruş ve mersûm Pavli zimmîye ikrâz ve teslîm eylediğim üç bin guruş ki cem‘an mersûmûn zimmetlerinde yedi bin dokuz yüz guruş alacak hakkım olmağla meblağ-ı mezkûru zimmiyyûn-ı mersûmûndan hâlâ taleb ederim deyü her birinin inkârlarına mukārin da‘vâya tasaddî etmiş idim. El-hâletü hâzihî ben tasaddî eylediğim da‘vâ-yı mezkûremden rızâmla meccânen fâriğ olmamla meblağ-ı mezkûr yedi bin dokuz yüz guruş mütâlebesine ve işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i de‘âvî ve kâffe-i mutâlebâtdan babam hâzır-ı mersûm Hıristo zimmî ile ma‘an mesfûrûn Yasef ve İstefo ve Pavli ve babaları hâzır-ı mersûm Dimitri zimmîlerden her birinin zimmetlerini, onlar dahi babam hâzır-ı mersûmdan inkârına mukārin cihet-i ma‘lûmeden iddi‘â eyledikleri üç bin yüz doksan dört buçuk guruş mutâlebesinden rızâlarıyla meccânen fâriğler olmalarıyla bi’l-cümle husûs-ı mezkûra ve işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i de‘âvîden benimle babam hâzır-ı mersûmun zimmetlerimizi her birimiz ibrâ-i âmm-ı sahîh-i şer‘î ve iskāt-ı tamm-ı sarîh-i mer‘î ile kabûlü hâvî ibrâ ve iskāt eyledik deyü ikrâr ve tasâdukları tescîl ve huzûr-ı âlîlerine i‘lâm olundu. Fî 19 R sene [12]57.