Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 544 Hüküm no: 668 Orijinal metin no: [90b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Raziye Hatun’un kızıyla evlenmek üzere nişan adı altında kendisine verdiği parayı, kızını evlendirmekten vazgeçtiği için geri vermesini istemesi Havâss-ı refî‘a kazâsına muzâfe Makrihora karyesinde sâkin Molla Ali b. Salih nâm kimesne Davudpaşa Mahkemesi’nde meclis-i şer‘de zâtı mu‘arrefe olan Râziye bt. Abdullah nâm hatun mahzarında mezbûr Râziye Hatun’un sadriye kızı gāibe ani’l-meclis Havva bt. el-Hâc Ahmed’i bana inkâh ve tezvîc etmek içün nişân nâmıyla mâlımdan yirmi guruş ve nafakası içün yirmi beş guruş ki cem‘an kırk beş guruş mezbûre Râziye Hatun’a def‘ ve teslîm ve ol dahi yedimden ba‘de’l-ahz ve’l-kabz lâkin mezbûre Râziye Hatun kızı gāib-i mezbûreyi bana tezvîcden ibâ etmekle ber-vech-i muharrer medfû‘um olan meblağ-ı mecmû‘-ı mezkûru mezbûre Râziye Hatun’dan istirdâd ederim deyü da‘vâ etdikde ol dahi cevâbında müdde‘î-i mezbûr yedinden ancak yirmi <> üç guruş ahzını ikrâr mâ‘adâ yirmi iki guruşu ba‘de’l-inkâr müdde‘î-i mezbûr Molla Ali ziyâde müdde‘âsını beyâna ba‘de’l-havâle mertebe-i ikrârı olan yirmi üç guruşu müdde‘î-i mezbûr Molla Ali’ye red ve teslîme mezbûre Râziye Hatun’a tenbîh olunduğu bi’l-iltimâs huzûr-ı âlîlerine i‘lâm olundu. Fî 28 min-Saferi’l-hayr sene 1197