Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 546 Hüküm no: 673 Orijinal metin no: [91a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sancakdar Hayreddin mahallesindeki Hatibzade arsasındaki kuyu içinde bıçak darbesiyle öldürülmüş, kim olduğu bilinmeyen bir ceset bulunduğu Sâdır olan fermân-ı âlîlerine imtisâlen derûn-ı arzuhâlde mezkûr olup ber-vech-i tahmîn târih-i i‘lâmdan bir ay mukaddem zikri âtî arsanın kuyusuna ilkā olunup cerîhan katîl bulunan ismi nâ-ma‘lûm müteveffânın keşfi içün Davudpaşa Mahkemesi’nden meb‘ûs Kâtib Numan Efendi dâ‘îleri asesbaşı ve subaşı ağa kulları ma‘rifetleriyle İslâmbol’da Sancakdâr Hayreddin mahallesinde vâki‘ Hatibzâde arsası demekle meşhûr muhterik arsaya varıp hâzır olan cemâ‘at-i Müslimîn ile müteveffâ-yı mezbûru zikr olunan kuyudan ihrâc ve ba‘de’l-keşf a‘zâsına nazar eylediklerinde müteveffâ-yı mezbûrun omzunda ve gerdânında ve başında ki cem‘an üç yerinde bıçak yarası ile mecrûh bulunduğu mu‘âyene ve müşâhede olunup defnine izin birle mezbûr dâ‘îleri vâki‘ hâli mahâllinde ketb ü tahrîr ve gelip alâ-vukū‘ıhî inhâ ve takrîr eylediği bi’l-iltimâs huzûr-ı âlîlerine i‘lâm olundu. Fî 6 Ra sene 1197